काठमाडौं । नेपाली कांग्रेसका नेता कृष्णप्रसाद सिटौलाले अहिलेको सरकार कांग्रेसको बलमा रहेको बताउनुभएको छ । बिहीबार काठमाडौंमा आयोजित एक कार्यक्रममा बोल्दै उहाँले यस्तो बताउनुभएको हो ।
नेता सिटौलाले ओली कांग्रेसको सहारामा प्रधानमन्त्री बन्नुभएकाले एक्लै अगाडि बढ्न नसक्ने बताउनु भयो । उहाँले अहिलेको सरकार विशेष परिस्थितिबाट निर्माण भएकाले यसलाई जोगाएर लैजानुपर्ने आवश्यकता रहेको बताउनु भयो । यो सरकारलाई बीचमा भत्किन दिनु नहुने उहाँको भनाइ छ ।
नेता सिटौलाले भन्नुभयो, ‘आखिर यो सरकार हाम्रो बलमा छ । केपी ओलीजी प्रधानमन्त्री हाम्रो बलमा हुनुहुन्छ । हाम्रो सहारामा हुनुहुन्छ । हामी बेगर उहाँ अगाडि एक्लै जान सक्नुहुन्छ भनेर हामी कोही पनि कल्पना गर्न सक्दैनौँ । एउटा विशेष परिस्थितिबाट निर्माण भएको सरकार हो यो । यसलाई हामीले जोगाएर लैजानु पनि छ ।'
सरकार जोगाउनका लागि जोगाउने नभई सरकारका नीति र व्यवहारबाट जनताका बीचमा काम गर्नुपर्ने बताउनु भयो ।
