बाँके । जनता समाजवादी पार्टी (जसपा) नेपालका अध्यक्ष उपेन्द्र यादवले ठूला पार्टीका नेताका कारण संघीयता कमजोर हुँदै गएको आरोप लगाउनुभएको छ ।
आज नेपालगञ्जमा अवधी पत्रकार संघले राखेको भेटघाटमा बोल्दै अध्यक्ष यादवले प्रदेश सरकार सञ्चालनका लागि कानुन समेत नहुँदा संघीयता खतरामा पर्ने संकेत भन्दै चिन्ता व्यक्त गर्नुभयो । उहाँले एमाले र नेपाली कांग्रेस दुई दलीय राजनीतिक अभ्यासतिर केन्द्रित हुँदा मुलुकमा भ्रष्टतन्त्र बढेको आरोप समेत लगाउनुभएको छ ।
अध्यक्ष यादवले दुई दलीय सरकारले आर्थिक र प्रशासनिक क्षेत्रमा समेत कुनै सुधार नगरेको भन्दै सरकार एकल राज्य निर्माणतर्फ उन्मुख हुन थालेको छैन भन्दै शंका व्यक्त गर्नुभयो ।
पार्टीको आन्तरिक कार्यक्रममा पश्चिम नेपालको भ्रमणमा रहनुभएका यादवले संघीयता बलियो बनाउन प्रदेशलाई अधिकारसम्पन्न बनाउनुपर्ने र त्यसका लागि संविधान संशोधनको आवश्यकता रहेको पनि बताउनुभयो ।
