कैलाली । परराष्ट्रमन्त्री आरजु राणाले प्रधानमन्त्री केपी शर्मा ओलीले चीन भ्रमणलगत्तै अर्को छिमेकी भारतको पनि भ्रमण गर्ने बताउनुभएको छ ।
प्रधानमन्त्री ओलीको चीन भ्रमणको तयारी गरिरहनुभएकी परराष्ट्रमन्त्री राणाले आज कैलालीको धनगढीमा पत्रकारहरुसँग कुरा गर्दै प्रधानमन्त्री ओलीले भारतको पनि चाँडै भ्रमण गर्ने बताउनुभएको हो ।
प्रधानमन्त्रीको चीन भ्रमणका एजेन्डा भने चिनियाँ पक्षले तय गरेपछि प्रधानमन्त्रीसँग छलफल गरी अन्तिम रुप दिइने उहाँले जानकारी दिनुभयो । परराष्ट्रमन्त्री राणाले भारत र चीन दुवै छिमेकी देश भएकाले दुवै देशसँग सन्तुलित सम्बन्ध कायम गरिने बताउनुभयो ।
यता नेकपा एमालेका महासचिव शंकर पोखरेलले प्रधानमन्त्रीको चीन भ्रमणका क्रममा दुई देशबीच उच्चस्तरको समझदारी कायम गरिने बताउनुभएको छ । उहाँले चीन भ्रमणका क्रममा विगतकै सम्झौता कार्यान्वयनमा जोड दिइने जानकारी दिनुभयो ।
प्रधानमन्त्री ओली आगामी मंसिर १७ गतेदेखि चीन भ्रमणको तयारीमा हुनुहुन्छ ।
