काठमाडौं । नेकपा माओवादी केन्द्रका अध्यक्ष एवम् पूर्वप्रधानमन्त्री पुष्पकमल दाहालले लोकतन्त्रको विकल्प सुदृढ लोकतन्त्रमात्रै हुन सक्ने बताउनुभएको छ ।
कान्तिपुर मिडिया ग्रुपले बुधबार आयोजना गरेको कान्तिपुर कन्क्लेभ–२०२४' अन्तर्गत ‘प्रचण्डपथ : सडक कि सत्ता ?’ विषयक सत्रमा बोल्दै अध्यक्ष दाहालले लोकतन्त्रको विकल्प अराजकता र निरंकुशता हुनै नसक्ने बताउनुभयो ।
उहाँले भन्नुभयो, ‘लोकतन्त्रको विकल्प सुदृढ लोकतन्त्रमात्रै हो । लोकतन्त्रको विकल्प अराजकता र निरंकुशता होइन ।’
अध्यक्ष दाहालले लोकतन्त्रको थप विकास र परिमार्जन गर्नुपर्ने बेला आएको स्वीकार गर्नुभयो । ‘लोकतन्त्र सधैँ प्रश्नको घेरामा रहन्छ । घेरामा रहेन भने लोकतन्त्रको विकास पनि हुँदैन,’ अध्यक्ष दाहालले भन्नुभयो, 'नेपालको लोकतान्त्रिक व्यवस्थाले जनताको आवश्यकता र चाहनालाई सम्बोधन गर्न नसकेको सत्य हो । तर यसको विकल्प छैन ।'
नेतृत्वले जनताको आवश्यकता र चाहनालाई सम्बोधन गर्न सक्नुपर्ने उहाँको भनाइ छ ।
