धनकुटा । कोशी प्रदेश सभाको सुशासन तथा योजना समितिले सार्वजनिक यातायात सञ्चालनमा देखिएका समस्या, चुनौती र तिनको समाधानका लागि सुझाव संकलन गरिरहेको छ ।
सरोकारवालाहरुसँग छलफल गरेर सरकारलाई निर्देशन दिने उद्देश्यले सुझाव संकलन गर्न कोशी प्रदेश सभाको सुशासन तथा योजना समिति सभापति मालती सुब्बा र इन्दिरा थापालगायत सदस्यको टोली धनकुटा पुगेको छ ।
समितिले धनकुटामा सुरक्षा निकायका प्रमुख, ट्राफिक प्रहरी, यातायात कार्यालय, स्थानीय तह, यातायात व्यवसायी तथा यातायात मजदुर संगठनलगायत सरोकारवाला निकायका प्रतिनिधिसँग छलफल गरी सुझाव र गुनासो संकलन गरेको छ ।
छलफलका सहभागीले कोशी प्रदेशमा सञ्चालित अटो नियमन र भाडादर, शाखा र भित्री सडकमा रुट परमिटको व्यवस्था, पहाडी रुटमा चल्ने सार्वजनिक यातायातमा भाडादरमा हुने गरेको मनपरि तथा मुख्य राजमार्गमा ढुवानी तथा यातायातका साधनबाट स्थानीयतहले उठाइरहेको दोहोरो-तेहेरो करका विषय उठाएका छन् ।
समिति सभापति मालती सुब्बाले भएका कानुनको कडाइका साथ कार्यान्वयन र आवश्यक देखिएका विषयलाई ऐन बनाएर नियमन गर्न सरकारलाई निर्देशन दिने बताउनुभएको छ ।
