काठमाडौं । नेपाली कांग्रेसले पश्चिम नेपालमा गएको भूकम्पबाट प्रभावितलाई थप सहयोग गर्ने तयारी गरेको छ ।
पार्टी सभापति शेरबहादुर देउवाको निवास धुम्बाराहीमा सोमबार बसेको पार्टी पदाधिकारी बैठकमा राहत उद्धार, पुनर्निर्माणको लेखाजोखा र त्यहाँका प्रभावित जनतालाई थप सहयोग गर्न कसरी सकिन्छ ? भन्ने विषयमा छलफल भएको पार्टीका नेता एवं अर्थमन्त्री प्रकाशशरण महतले जानकारी दिए । बैठकमा समसामयिक विषयमा पनि छलफल भएको उनको भनाइ छ । उनले सरकारले अस्थायी आवासका लागि प्रभावित परिवारलाई दिने भनेको ५० हजार रुपैयाँ आजै जिल्ला तहमा पुग्ने दाबी गरे । प्रभावित परिवारलाई सहयोगका लागि पार्टीको आह्वानमा खटिन चाहनेले अस्थायी आवास निर्माणका लागि सहयोग गर्नसक्ने बारेमा पनि बैठकमा छलफल भएको महतको भनाइ छ ।
‘भूकम्पले जाजरकोट र रुकुम पश्चिममा जुन भूकम्बाट क्षति भयो, त्यसपछिको राहत उद्धार, पुनर्निर्माणको लेखाजोखा र त्यहाँका प्रभावित जनतालाई थप सहयोग गर्न कसरी सकिन्छ ? भन्ने विषयमा छलफल भयो । थप समसामयिक विषयमा पनि छलफल भयो । भूकम्पप्रभावित क्षेत्रमा सरकारले ५० हजारका दरले हरेक क्षति भएका घरका परिवारलाई दिने अस्थायी आवासका लागि भनेको छ । त्यो चाँडै पुग्नुपर्ने र आज जिल्ला तहमा पुग्छ र जिल्ला विपद् कोषले गाउँपालिकामार्फत सम्बन्धितकोमा पुग्छ, त्यसपछि अस्थायी आवास बनाउनुहुनेछ । पार्टीले त्यहाँ स्वयंसेवक बेसिसमा सहयोग गर्न चाहनेहरुलाई परिचालन गर्ने कुरा भएको छ ।’
मन्त्री महतले मंसिर ७ गतेको आन्दोलनलाई लिएर सरकारले गम्भीर रुपमा हेरिरहेको जानकारी दिए । उनले संविधानले जनताका हरेक अधिकारलाई सुनिश्चित गरे पनि समाजभन्दा बाहिर गएर अभिव्यक्ति दिन नहुने बताए । मंसिर ७ गते दुई पक्षको आन्दोलन भएकाले त्यसबाट आउने समस्याबारे सरकार सचेत रहेको उनले दोहोर्याए ।
‘हामी लोकतन्त्रमा विश्वास गर्ने सरकार र पार्टी हो । संविधानले जनताका हरेक अधिकारलाई सुनिश्चित गरेको छ । अभिव्यक्ति, बिरोध, माग गर्ने स्वतन्त्रता सुनिश्चित छन् । तर एकै ठाउँमा दुईपक्षीय उपस्थित हुने, त्यसबाट आउनसक्ने समस्याबारे सरकारले नजिकबाट हेरिरहेको छ । सडकको परिस्थिति आउन नदिने, कुरामा सरकार सचेत छ । समाज बाहिर गएर कुनै पनि गतिविधि हुनु हुँदैन,’ उनले भने, ‘अहिले सामाजिक सञ्जालदेखि हरेक माध्यमको प्रयोग गरेर आफ्नो अभिव्यक्ति दिइरहेका छन् । त्यो त लोकतन्त्रले दिएको हो ।’ ‘
अर्थमन्त्री महतले अधिकार प्राप्तिको स्वतन्त्रताका लागि आफूहरु पनि लड्न तयार रहेको जनाए । उनले भने, ‘अधिकारको लागि जुन पार्टीहरु लडे, जनताहरु लडे, त्यहाँबाट आएको हो । अधिकार प्राप्तिको स्वतन्त्रताका लागि हामी भोलि पनि लड्छौं । हामीले पाएको अधिकारको प्रयोग गरेर त्यही अधिकारको निषेध गर्ने प्रवृत्तिलाई प्रोत्साहन दिनु हुँदैन ।’
