काठमाडौं । प्रधानमन्त्री पुष्पकमल दाहालले भारतको नयाँ संसद् भवनमा नेपालको भूमिसमेत सामेल गरिएको नक्साबारे आफूले कुरा नउठाएको भन्ने साँचो नभएको दाबी गरेका छन् ।
राष्ट्रियसभा बैठकमा बुधबार सांसदहरुले उठाएका प्रश्नको जवाफ दिने क्रममा उनले यो विषयमा आफूले भारतीय पक्षसँग गम्भीरतापूर्वक कुरा उठाएको स्पष्टीकरण दिए । प्रधानमन्त्री दाहालले मिडियामा त्यसबारे आएको विषयमा आफूले भारतीय पक्षसँग कुरा राखेको र भारतीय पक्षबाट यो कुनै राजनीतिक नक्सा नभएकाले त्यसलाई राजनीतिक रुपमा नहेर्न भनेको जवाफ आएको पनि जनाए ।
उनले यो विषयमा भारतसँग अझ बढी अध्ययन र छलफल गर्ने आश्वासनसमेत दिए । ‘पहिलो कुरा संसद्को नक्साबारे कुरा भयो । मैले गम्भीर रुपमै उठाएँ । किनकि त्यो धेरै अध्ययन भइसकेको त थिएन । तर पनि जसरी मिडियामा आएको थियो । त्यो विषयमा त्यसरी नै प्रश्न गरेँ । यो के हो नयाँ संसद् भवनमा भारतले राखेको नक्साबारे विभिन्न कोणबाट चर्चा भएको छ भन्दा उहाँहरुले दिएको जवाफ मैले प्रतिनिधिसभामा पनि भनेको थिएँ,’ प्रधानमन्त्री दाहालले भने ।
प्रधानमन्त्री दाहालले भारतको नयाँ संसद्मा राखिएको नक्सा सांस्कृतिक भएको कुरा पनि भारतीय पक्षले राखेको जानकारी दिए । ‘यो कुनै राजनीतिक नक्सा होइन । यो ऐतिहासिक र सांस्कृतिक नक्सा हो । यसलाई राजनीतिक रुपले हेर्न हुँदैन भन्ने उहाँहरुको जवाफ थियो,’ उनले भने, ‘अब योबारे अझ बढी अध्ययन गर्ने, छलफल गर्ने कुरा त बाँकी नै छ । त्यसकारण कुरा उठाएन केही पनि भएन भन्ने कुरा साँचो होइन ।’