बारा । सामान्यतया पुल भनेको बीचको अवरोध पार गरेर दुई स्थानमा आवागमन सहज बनाउने साधन हो । तर बारा र रौतहटमा बनाइएका दुईवटा झोलुङ्गे पुल किन र के प्रयोजनको लागि बनाइयो त्यस भेगका नागरिकले अहिलेसम्म बुझ्नसकेका छैनन् ।
संघीय झोलुंगे पुल क्षेत्रगत कार्यक्रमअन्तर्गत बाराको करैयामाई गाउँपालिका-१ खमवा गाउँमा करिब २२ लाखको लागतमा यो झोलुगें पुल निर्माण भएको हो । तर झोलुंगे पुलमा पहुँच मार्ग नहुँदा उपभोगभन्दा बढी आलोचना बटुलिरहेको छ ।
पसाहा खोला वारपार गर्न बनाइएको झोलुंगे पुल हेर्दा स्थानीय पनि दंग छन् । खोला तर्न बनाईको पुल नै खोलाको बीचमा बनाइएको छ । त्यतिमात्र हैन पुलमा जानकोलागि बाटो पनि छैन् ।
गाउँपालिकाका प्राविधिकले भने पुल निर्माण गर्दा खोलाको धार परिवर्तन गरिएको र पुल बनेपछि बजेटको अभावमा त्यतिकै छाडिएको बताउँछन् ।
त्यस्तै रौतहटको यमुनामाई गाउापालिकाको वडा नम्बर २ भेडियाहिमा पनि संघीय झोलुंगे पुल क्षेत्रगत कार्यक्रमबाट करिब ४० लाखको लागतमा कामदेही खोलामा निर्माण भएको यो पुलको पनि कुनै औचित्य छैन् ।
पुल निर्माण भएपनि त्यहाँ जानका लागि बाटो छैन् । बाटोबिना नै खोलामा झोलुंगे पुल बनेपछि स्थानीयले विरोध जनाएका छन् । तर त्यहाँका वडाअध्यक्षले भने गाउँपालिका कार्यालयले सहयोग नगर्दा बाटो बन्न नसकेको बताउनु भएको छ ।
पुलजस्तो संरचना बनाउनु अघि त्यसको पहुँच, उपयोगकर्ता र सागसागैका पूर्वाधार सुनिश्चित हुनु अत्यावश्यक हुन्छ । तर विकासको नाममा बजेट सकाउने हतारोले यस्तो योजनाले न त जनतालाई सुविधा दिन्छ, न सरकारलाई विश्वास ।
