काठमाडौं । एसोशिएशन अफ नेपाल तराई इन अस्ट्रेलिया (एन्टा) को आयोजनामा गत शनिबार ग्रानभिल पार्कमा थुप्रै नेपाली भेला भई होली मनाएका छन् । ह्वाइट स्पट ग्रुपको प्रस्तुति रहेको उक्त होली मेलामा नेपाली खाना र तराई/मधेश झल्किने विशेष प्रस्तुति पनि समेटिएका थिए ।
स्थानीय ग्रानभिल क्षेत्रकी सांसद जुलिया फीनले औपचारिक रूपमा होलीको शुभारम्भ गर्दै बहुसांस्कृतिक समाजको सुन्दरता भनेको सबै धर्म, जात र कला संस्कृतिको सम्मान गर्नु रहेको बताउनुभयो । यसमाथि पनि रङको पर्वको रूपमा मनाइने होलीले अस्ट्रेलियामा समेत चर्चा पाइसकेको जिकिर गर्नुभयो ।
कार्यक्रममा एनआरएन ओसेनियाका उपसंयोजक अरुण ठाकुरले होली राष्ट्रिय पर्व बनिसकेको र विदेशमा रहँदा पनि यसको महत्त्व बिर्सन नहुने बताउनुभयो । ठाकुरले रङको मिश्रणसँगै रंगिने होलीले नेपालीबीच पनि आपसी सद्भाव र अपनत्व काय राख्न थप मद्दत पुग्ने बताउनुभयो ।
एन्टाका अध्यक्ष रञ्जित शाहले नेपालबाट सात समुद्रपारि आए पनि आफ्नो कला संस्कृति बिर्सनु नहुने बताउँदै सहयोग र सद्भावका साथ भव्य रूपमा सफल बनाउन सहयोग गर्ने मनहरूलाई धन्यवाद ज्ञापन गर्नुभयो । उहाँले नेपाली कला संस्कृतिको जर्गेना गर्ने उद्देश्यका साथ पनि सिड्नीमा एन्टाले होली पर्व आयोजना गर्दै आएको सुनाउनुभयो ।
एन्टाका बोर्ड अफ डिरेक्टर अंगद मिश्राले कार्यक्रमको सफलताको कामना गर्दै अस्ट्रेलियामा आएर पनि होली मनाउन पाउनु गर्वको विषय रहेको बताउनुभयो ।
कार्यक्रममा गायक सुदिन पोखरेल, निर्देशक सोभित बस्नेत तथा कलाकारहरू आरिफ रौफ, सुशान्त गौतम, सन्ध्या जोशी, उल्सन श्रेष्ठ, समय ब्यान्ड, डीजे नटकेस, मानस राज, जेनिशा गौतम लगायतको विशेष प्रस्तुति रहेको थियो ।
