रौतहटमा दुई पक्षबीच झडप, स्थिति नियन्त्रणमा लिन प्रशासनद्वारा कर्फ्यु आदेश जारी

रौतहट । विवाहमा बाजा बजाउँदै गइरहेका जन्तीमाथि अवरोध खडा गरेको विषयलाई लिएर सुरू भएको विवाद झडपमा परिणत भएपछि जिल्ला प्रशासन कार्यालय रौतहटले कर्फ्यु आदेश जारी गरेको छ।

रौतहटको गौर नगरपालिका वडा नं ६ सपगढा टोलमा शुक्रबार बिहानदेखि सुरू भएको झडप नियन्त्रणमा लिन स्थानीय अगुवाहरूको उपस्थितिमा जिल्ला प्रशासन कार्यालय रौतहटमा छलफल भएर सहमति भएको थियो । प्रमुख जिल्ला अधिकारी दिनेश सागर भुसालका अनुसार दुवै समुदायका अगुवाहरूले ६ बुँदे सहमति गरेको बताए पनि शनिबार बिहानदेखि विवाद पुन: सुरू भई झडप भएको हो। 

झडपका क्रममा ६ जना घाइते हुनुका साथै एउटा भारतीय नम्बरको स्कार्पियोमा समेत आगजनी गरिएको छ । झडपमा दुई जना प्रहरीसमेत घाइते भएका छन्। प्रशासनले गौर नगरपालिकाको पूर्वमा मुडबलवा गेट, पश्चिममा लाल बकैया बाँध, उत्तरमा बम नहर र दक्षिणमा गौर भन्सार कार्यालय क्षेत्रमा दिउँसो १ बजेदेखि कर्फ्यु आदेश जारी गरेको हो ।