काठमाडौं । राष्ट्रिय स्वतन्त्र पार्टी-रास्वपाका सभापति रवि लामिछाने जिल्ला अदालत रूपन्देहीमा उपस्थित भएर थुनामुक्त हुनुभएकाे छ ।
काठमाडौंबाट शनिबार जिल्ला अदालत रूपन्देहीमा उपस्थित भएर लामिछानेले धरौंटी वापतको एक करोड र बिगो वापतको २ करोड ७४ लाख ८४ हजार बैंक जमानत बुझाएर रिहा हुनुभएको हो । काठमाडौंबाट चितवन हुँदै शुक्रबार साँझ रूपन्देही पुग्नुभएका लामिछाने जिल्ला अदालत रूपन्देहीमा उपस्थित भएर थुनामुक्त हुनुभयाे । तुलसीपुर उच्च अदालतको आदेशमा रिहा भएपछि आवश्यक कागजी प्रक्रिया पूरा गर्न शुक्रबार साँझ जिल्ला अदालतमा उपस्थित हुनुभएकाे थियाे ।
प्रतिकूल मौसमका कारण काठमाडौंबाट भैरहवास्थित गौतमबुद्व अन्तर्राष्ट्रिय विमानस्थलमा उडान भर्न नपाएपछि चितवनको भरतपुर विमानस्थल भएर सडकमार्गबाट लामिछाने रूपन्देही पुग्नुभएकाे थियाे । जिल्ला अदालतका सूचना अधिकारी पदम अर्यालले कानुन व्यवसायीको रोहबरमा सनाखतका लागि पहिल्यै कागजात तयारी अवस्थामा राखेका कारण छिट्टै काम सकिएको जनाउनुभयाे । जिल्ला अदालतले नै पत्राचार गरेर बोलाएका कारण कार्यालय समय बन्द भए पनि कुरेरै कागजी प्रक्रिया पूरा गरिएको उहाँले बताउनुभयो ।
