डोल्पा । डोल्पामा एक हजार सात जना नयाँ मतदाता थपिएका छन्।
प्रतिनिधि सभा सदस्यको निर्वाचन घाेषणा भएपछि डोल्पामा एक हजार सात मतदाता थपिएको जिल्ला निर्वाचन कार्यालय डोल्पाले जानकारी दिएको हाे। निर्वाचन आयोगले सञ्चालन गरेको मतदाता नामावली दर्ता तथा अद्यावधिकका लागि थप गरेको समय गत मंसिर ६ गते रातिदेखि सकिएपछि डोल्पामा नाम दर्ता गरेका नयाँ मतदाताको विवरण सार्वजनिक भएको हो ।
फोटो तथा औँठा छापसहितको बायोमेट्रिक विवरणमार्फत पाँच सय ९८ र राष्ट्रीय परिचय पत्रमार्फत चार सय नाै जना नयाँ मतदाता थपिएको जिल्ला निर्वाचन कार्यालय डोल्पाका निमित्त जिल्ला निर्वाचन अधिकारी श्याम कुमार राईले जानकारी दिनुभयाे ।आयोगले राष्ट्रिय परिचय पत्रको विवरणका आधारमा मतदाता नामावलीमा नाम दर्ता गराउन मिल्ने गराएपछि अनलाइनबाट नाम दर्ता गराउने संख्या थप बढेको निमित्त अधिकारी राईले बताउनुभयाे।
डोल्पामा गत असोजसम्म १८ वर्ष पूरा भएका मतदाताको संख्या २३ हजार २ सय ४९ रहेको थियो। असोजपछि भने एक हजार भन्दा बढी मतदाता थपिएसँगै अब डोल्पामा मतदाताकाे संख्या २४ हजार २ सय ५६ पुगेको छ । यो संख्या अन्तिम भने नभएको र कोही मृत्यु र देश बाहिर रहेका कारण केही थपघट हुने जिल्लामा निर्वाचन कार्यालय डोल्पाले जानकारी दिएको छ ।
निर्वाचन आयोगले प्रत्येक जिल्लामा मंसिर १५ गते सम्म नयाँ विवरण सार्वजनिक गर्ने र पुष २० सम्म मतदाताको अद्यावधिक डाटा पठाउने छ। भौगोलिक हिसाबले नेपालकै सबै भन्दा ठूलो जिल्ला रहेको डोल्पामा प्रतिनिधि सभा क्षेत्र नं १ मा ६६ मतदानस्थल रहेका छन् । अहिलेको प्रतिनिधि सभा निर्वाचनमा डोल्पामा दुई वटा नयाँ मतदान स्थल थप तथा माग निर्वाचन आयोगमा सिफारिस गरिएको जनाइएको छ ।
निमित्त निर्वाचन अधिकारी राईका अनुसार भौगोलिक हिसाबले ठूलो रहेको डोल्पाकाे माथिल्लो क्षेत्रमा कर्मचारी पठाउन, मतदानपछि मतपेटिका पुर्याउन र आकस्मिक स्वास्थ्य समस्या उद्धार गर्न अझै पनि हेलिकप्टरमा निर्भरता हुनु परेको छ । भौगोलिक अवरोधका कारण डोल्पाका माथिल्लो क्षेत्रमा मतपेटिका पैदल ल्याउन सम्भव छैन, हेलिकप्टर चलाउनै पर्छ, जसले निर्वाचन खर्च बढाइरहेको छ ।
डोल्पामा भौगोलिक विकटताबाहेक अन्य ठूला प्राविधिक चुनौतीसँगै उपल्लो क्षेत्रमा सुरक्षा जोखिम, प्रतिकूल मौसम र राजनैतिक गतिविधि न्यून भएका कारण चुनाव सञ्चालनमा झनै जटिल हुने गर्छ।
.png&w=400&height=300)
