काठमाडौं । गाजामा मृत्यु भएका कञ्चनपुरका विपिन जोशीको शव आज दिउँसो नेपाल ल्याइने भएको छ । विपिनलाई श्रद्धाञ्जली दिन प्रधानमन्त्री सुशीला कार्की विमानस्थल जानु हुनेछ । आज दिउँसो साढे दुई बजे जोशीको शव फ्लाई दुबईमार्फत काठमाडौं आइपुग्नेछ ।
विपिनको पार्थिव शरीरको सम्मानपूर्वक व्यवस्थापन र स्थानान्तरणका लागि विमानस्थलमा सम्पूर्ण तयारी पूरा गरिएको छ।
विमानस्थल पुगेर प्रधानमन्त्री कार्कीले श्रद्धाञ्जली दिने कार्यक्रम रहेको परराष्ट्र मन्त्रालयका एक अधिकारीले बताए ।
विमानस्थलमा श्रद्धाञ्जली दिएर विपिनको शवलाई नेपाली सेनाको विमानमार्फत धनगढी लैजाने तयारी छ । त्यसपछि महेन्द्रनगर लगिने बताइएको छ।
हमासले ७ अक्टोबर २०२३ मा इजरायलमा आकस्मिक आक्रमण गरेको थियो । त्यसबेला १० नेपाली विद्यार्थीसहित करिब १ हजार २ सयको मृत्यु भएको थियो । विपिनसहित २ सय ५१ जना हमासको नियन्त्रणमा परेका थिए ।
त्यो दिन बिहान साढे ६ बजेतिर एक्कासि मिसाइल आउन थालेपछि विपिनसहित उनका साथीहरु किबुज अलुमिमको बंकरमा बसेका थिए । त्यसको केही समयपछि स्थलमार्गबाट आएका हमासका लडाकुले आक्रमण गर्न थाले । नेपाली विद्यार्थीहरुले ‘वी आर नेपाली, वी आर नेपाली’ भनिरहँदा समेत उनीहरुले आक्रमण गरिरहे । पछि एउटा ग्रिनेड विपिनले टिपेर बाहिरतिरै फ्याँकिदिएका भिडियोमा देखिएको थियो । त्यहीबेला हमासले उहालाई अपहरण गरेको थियो ।
अमेरिकाको सहजीकरणमा युद्धविराम भएपछि उनी छुट्ने अपेक्षा गरिएको थियो । तर, जोशीको मृत्यु भइसकेको जानकारी हमासले दिएको भन्दै इजराइल डिफेन्स फोर्स (आईडीएफ) ले जोशीको परिवार, इजरायलस्थित नेपाली राजदूत र अरुलाई जानकारी गरायो । गत सोमबार हमासले विपिनको शव इजरायललाई हस्तान्तरण गरेको थियो।
