सिन्धुपाल्चोक। सिन्धुपाल्चोकको अरनिको राजमार्गमा शुक्रबार बिहान दूध बोक्ने भ्यान भोटेकोसी नदीमा खस्दा चालक बेपत्ता भएका छन्।चौतारा साँगाचोकगढी नगरपालिका–१० सुकुटेस्थित सिन्धु दुग्ध डेरीको दूध संकलन गर्ने बा १२ च ६५९४ नम्बरको मारुती मिनि डेलिभरी भ्यान सुकुटेबाट खाडिचौर जाँदै गर्दा सडकबाट करिब ५० मिटर तल भोटेकोशी नदीमा खसेको प्रहरीले जानएको छ ।
गाडी काभ्रे पनौती नगरपालिका–१० पस्थलीका नवराज खुलालले चलाइरहेका थिए। दुर्घटनाका बेला उनी मात्र सवार रहेको र खसेपछि बेपत्ता भएको प्रहरीले जनाएको छ ।
घटनापछि प्रहरी चौकी बलेफीबाट प्रहरी नायव निरीक्षक सुरेशप्रसाद गुप्ताको कमाण्डमा चार जनाको टोली खटिएर खोजी कार्य भइरहेको जिल्ला प्रहरी कार्यालय सिन्धुपाल्चोकले जानकारी दिएको छ।
