काठमाडौं । सांघाई सहयोग संगठन-एससीओको सम्मेलनमा सहभागी हुन चीन पुग्नु भएका भारतीय प्रधानमन्त्री नरेन्द्र मोदी र चिनियाँ राष्ट्रपति सी चिनफिङ थियानजीनमा भेटवार्ता भएको छ ।
वार्ताका अवसरमा दुवै नेताबीच सीमा समस्या, सिधा हवाई उडान तथा कैलाश-मानसरोबर यात्रा पुन: सञ्चालनलगायतबारे छलफल भएको अन्तर्राष्ट्रिय सञ्चारमाध्यमले जनाएका छन् ।
त्यसअवसरमा भारतीय प्रधानमन्त्री मोदीले सीमामा भएको तनावपछि शान्ति र स्थिरताको वातावरण बनेको र दुवै देशका अधिकारीबीच सीमा व्यवस्थापनका विषयमा सहमति बनेको बताउनुभएको छ ।
जवाफमा चिनियाँ राष्ट्रपति सीले एसिया र बाँकी विश्वमा शान्ति र समृद्धिका लागि दुवै मुलुकले मिले काम गर्नुपर्नेमा जोड दिनुभएको जनाइएको छ ।
गत वर्ष अक्टोबरमा रूसमा आयोजित ब्रिक्स सम्मेलनमा भएको मोदी-सी भेटपछि दुवै मुलुकबीच सम्बन्ध सुधारको सुरूवात भएको थियो । उक्त भेटमा दुवै नेता नियन्त्रण रेखाबाट पछि हट्न सहमत भएका थिए ।
मोदीले भोलि सोमबार थियानजीनमा रूसी राष्ट्रपति भ्लादिमिर पुटिनसँग भेटवार्ता गर्ने तालिका छ । अमेरिकाले रुसी तेल खरिद गरेको भन्दै ५० प्रतिशत कर लगाएपछि पहिलो पटक दुवै नेताले भेट गर्न लागेका हुन् ।
