काठमाडौं । सांघाई सहयोग संगठन-एससीओको शिखर सम्मेलनका लागि चीनको थियानजीनमा रहनु भएका प्रधानमन्त्री केपी शर्मा ओलीले आइतबार हुवाइस्थित धान उत्पादनको विशेष क्षेत्र भ्रमण गर्नु भएको छ ।
प्रधानमन्त्रीले धान उत्पादन क्षेत्रको भ्रमण गर्दै कृषि, पर्यटन र शिक्षालाई जोड्दै थालिएका नमुना कार्यबारे जानकारी लिनुभएको प्रधानमन्त्रीको सचिवालयले जनाएको छ ।
यसैगरी प्रधानमन्त्रीले आजै नानकाई जिल्लास्थित चाउ एनलाई र तेङ यिङचाओ स्मृति संग्रहालयको अवलोकन गर्नुभएको छ । प्रधानमन्त्री ओलीले शनिबार चिनियाँ राष्ट्रपति सी चिनफिङसँग दुई पक्षीय भेटवार्ता गरी नेपाली भूमि लिपुलेकलाई व्यापारिक मार्गका रुपमा प्रयोग गर्ने गरी भारत र चीनबीच भएको सहमतिप्रति आपत्ति जनाउनुभएको थियो ।
ओलीले लिपुलेकबारे दुई देशबीच भएको सहमतिप्रति आपत्ति जनाउनुभएको परराष्ट्र सचिव अमृतबहादुर राईले जानकारी दिनुभयो । सन् १८१६ को सुगौली सन्धिबमोजिम महाकालीपूर्वका सबै भूभागहरू सार्वभौम नेपालको भएको स्पष्ट रहेको उल्लेख गर्दै प्रधानमन्त्री ओलीले यस मामिलामा चीनले नेपाललाई सहयोग गर्ने अपेक्षा व्यक्त गर्नुभएको सचिव राईले बताउनुभयो ।
राष्ट्रपति सीसँगको सौहार्दपूर्ण र द्विपक्षीय भेटमा दुई देशबीचको मित्रवत सम्बन्ध र सहकार्यका विविध क्षेत्रमा कुराकानी भएको र सहकार्य बढाउन दुई देशका संयन्त्र अग्रसर हुने समझदारी भएको प्रधानमन्त्रीको सचिवालयले जनाएको छ ।
भेटवार्ताका अवसरमा राष्ट्रपति सीले नेपाललाई भूपरिवेष्टितबाट ठूला बजारमा आवद्ध हुने देशको रूपमा विकास भएको हेर्न चाहेको बताउनुभएको प्रधानमन्त्रीका सल्लाहकार युवराज खतिवडाले जानकारी दिनुभयो।
बेइजिङस्थित नेपाली दूतावासले पनि एक विज्ञप्ति जारी गर्दै बीआरआईसहित विगतमा सहमति भएका परियोजनाको कार्यान्वयनलाई तीब्रता दिन पनि प्रधानमन्त्रीले आग्रह गर्नुभएको जनाएको छ ।
यस्तै, मल, पेट्रोलियम अन्वेषण, मानव संशाधन तथा जलवायु परिवर्तनका विषयमा पनि सहयोगका लागि नेपालले आग्रह गरेको दूतावासले जनाएको छ । जवाफमा राष्ट्रपति सीले बीआरआई परियोजनाको कार्यान्वयनलगायत नेपालको विकासमा चीनका निरन्तर सहयोग रहने दोहोर्याउनुभएको जनाइएको छ ।
प्रधानमन्त्री ओली सांघाई सहयोग संगठन-एससीओको २५ औं शिखर सम्मेलनमा सहभागी हुन चीनको थियानजीन पुग्नुभएको हो । सम्मेलनका क्रममा भारतीय समकक्षी नरेन्द्र मोदीसँग भेटवार्ता हुने कार्यतालिका भने नरहेको सचिवालयले जनाएको छ ।
एससीओ बैठक आज र भोलि चीनको थियानजीनमा हुँदैछ। नेपाल ‘संवाद साझेदार’ का रूपमा एससीओमा सहभागी हुन लागेको हो। प्रधानमन्त्री ओलीले सम्मेलनका अवसरमा ‘एससीओ प्लस’ बैठकलाई सम्बोधन गर्नुहुनेछ । सम्मेलनमा सहभागी अन्य देशका नेताहरूसँग पनि प्रधानमन्त्री ओलीको ‘साइडलाइन’ भेट हुनेछ। प्रधानमन्त्री ओलीले १७ भदौमा चीनका उपराष्ट्रपति हान चङसँग बेइजिङमा भेट गर्नुहुनेछ ।
