मधेश प्रदेश वन निर्देशनालयमा तालाबन्दी

भाद्र १५, २०८२ |अनिल मिश्र
मधेश प्रदेश वन निर्देशनालयमा तालाबन्दी

जनकपुरधाम । भवन निर्माणको काम पुरा भई सञ्चालनमा आएको एक वर्ष भन्दा बढी समय बितिसके पनि भुक्तानी नदिएको भन्दै निर्माण व्यवयासीले जनकपुर स्थित मधेश प्रदेश वन निर्देशनालयमा आइतबार तालाबन्दी गरेका छन ।

सम्झौताअनुसारको बक्यौता रकम भुक्तानीका लागि पटक-पटक ताकेता गरे पनि कुनै सुनवाइ नगरेपछि वाध्य भएर तालाबन्दी गर्नु परेको निर्माण व्यवसायीको आरोप छ ।

भवन निर्माणका लागि प्रदेश वन निर्देशनालयसँग २०७९ असार २३ गते भएको सम्झौताअनुसार ५ करोड मध्ये धरौटी रकमसहित ७० लाख भन्दा बढी भुक्तानी लिन बाँकी रहेको रामजानकी निर्मा सेवाको दाबी छ । 

सम्झौताअनुसार समयमा काम पूरा गर्न नसकेपछि एक वर्षको म्याद थप गरिएको र सो समय भित्र पनि बिल पेस गर्न नसकेका कारण भुक्तानीमा समस्या उत्पन्न भएको वन निर्देशक जगन्नाथ प्रसाद जयसवालको भनाइ छ ।


Image

अनिल मिश्र

मिश्र कान्तिपुर टेलिभिजनका जनकपुर संवादताता हुन् ।