काठमाडौं । चीन भ्रमणमा रहनुभएका प्रधानमन्त्री केपी शर्मा ओलीको भारतीय प्रधानमन्त्री नरेन्द्र मोदीसँग भेट नहुने भएको छ।
चिनियाँ राष्ट्रपति सी चिनफिङसँग शनिबार भेटवार्ता गर्नुभएका प्रधानमन्त्री ओलीको मोदीसँग भेटको कार्यक्रम नरहेको प्रधानमन्त्रीको सचिवालयले जनाएको छ।
कान्तिपुर टेलिभिजनलाई भ्रमणबारे जानकारी दिँदै भ्रमण टोलीमा रहनुभएका पत्रकार प्रकाश सिलवालले मोदीसँग भेटवार्ताको कार्यतालिका नरहेको जानकारी दिनुभयो।
'भारत भ्रमण तय भइसकेको अवस्थामा भारतका प्रधानमन्त्री मोदीसँग प्रधानमन्त्रीको भेटवार्ताको कार्यक्रम चीनमा छैन', सिलवालले भन्नुभयो। शनिबार चिनियाँ राष्ट्रपति सीसँगको द्वीपक्षीय भेटका क्रममा प्रम ओलीले भारत-चिनबीच लिपुलेकलाई व्यापारिक मार्गका रूपमा प्रयोग गर्ने सहमतिमा नेपालको आपत्ति प्रकट गर्नुभएको थियो। भारतीय प्रम मोदीसँग भेटवार्ता भएको अवस्थामा ओलीले सो विषय उठाउने अपेक्षा गरिएको थियो।
सांघाइ कोअपरेसन अर्गनाइजेसनको २५ औं शिखर सम्मेलनका लागि प्रम ओली शनिबार चीन पुग्नुभएको हो।