जनकपुर । मिथिला संस्कार र सभ्यता चिनाउन मिथिला चित्रकलाको अहम् भूमिका छ ।
घरको भित्ता र आगनमा परम्परागत रूपमा कोरिने चित्रलाई नेपाल-भारतमा मात्र नभई अन्तरार्ष्ट्रिय बजारमा पुर्याउने विभिन्न चित्रकारमध्ये एक हुनुहुन्छ जनकपुरकी सुनैना ठाकुर।
उहाँले बनाएको मिथिलाको मौलिक पहिचान सहितको चित्र कोरिएको झोलामा प्रदेश सरकारले चालु आर्थिक वर्षको बजेट प्रस्तुत गरेपछि ठाकुरको चर्चा त बढेको नै छ, व्यस्तता पनि निकै बढेको छ ।
जनकपुरधामको पहिचान, आस्था र विश्वासको केन्द्र यो ऐतिहासिक जानकी मन्दिर हो । यसै धरोहरको मुख्य प्रवेशद्वारसँगै रहेको छ सुनैना मिथिला आर्ट ग्यालरी । सर्लाहीको गौरीशंकर नगरपालिका ईश्वरपुरमा २०४१ सालमा जन्मिनु भएकी ठाकुरले यहाँ ९ वर्षदेखि ग्यालरी सञ्चालन गर्दै आउनुभएको छ ।
पछिल्लो समय रामसीताको वैवाहिक झझल्को दिने वरमाला, मिथिलामा अत्यन्त शुभ मानिएको माछा, हात्ती र वातावरणमैत्री रूख बिरुवाको चित्र कोरिएको झोलामा प्रदेश सरकारले चालु आर्थिक वर्षको बजेट वक्तब्य प्रस्तुत गरेपछि चित्रकार सुनैना ठाकुर अहिले थप चर्चामा हुनुहुन्छ ।
मिथिला संस्कृति, रहन सहन, जनजीवन, खानपान, घर गृहस्थी, पूजाआजालगायत विविधता झल्काउने चित्रकलामा सुनैना ठाकुर २५ वर्षदेखि समर्पित हुनुहुन्छ । मिथिला चित्रकलालाई आयआर्जनसँग जोड्न सफल ठाकुरले प्रत्यक्ष रूपमा ६ जना र अप्रत्यक्षरूपमा ९ जनालाई रोजगारीसमेत दिनुभएको छ ।
मिथिला चित्रकलाकै प्रवर्द्धनका शिलशिलामा जापान, अमेरिका, बंगलादेश, श्रीलंका, भारतलगायतका देशको भ्रमण गर्नुका साथै राष्ट्रिय-अन्तर्राष्ट्रिय पुरस्कारबाट समेत उहाँ सम्मानित हुनुभएको छ ।
सुनैनाको ग्यालरीमा धोती, कुर्ता, गमछा, साडी, सुरवार, बण्डी, दुपट्टा, पाग, रुमाल, विद्यालय झोला, ल्यापटप झोला, बेडसिटलगायत ८० भन्दाबढी मिथिला चित्रकला कोरिएका सामाग्रीहरू पाइन्छन् ।
