रामेछाप । रामेछापको मन्थली नगरपालिका जिल्लाकै पहिलो बालमैत्री स्थानीय शासनयुक्त पालिका बनेको छ ।
बागमती प्रदेशका सामाजिक विकासमन्त्री कन्चनचन्द्र बादेले औपचारिक घोषणा गर्दा सरोकारवालाले भने यसको दिगोपनाका लागि विशेष योजना र प्रभावकारी कार्यान्वयनको आवश्यकतामा जोड दिएका छन् ।
मन्थली नगरपालिकाले बाल संरक्षण, बचाउ, विकास, सहभागिता र संस्थागत विकासका ५१ वटै सूचक पूरा गरेपछि बालमैत्री स्थानीय शासनयुक्त नगरको मान्यता पाएको हो ।
यही भदौ ११ गते घोषणा भएसँगै मन्थली, जिल्लाकै पहिलो, बागमती प्रदेशको ११औं र देशको २७औं बालमैत्री पालिका बनेको छ । सरकारले २०८७ सालभित्र देशका सबै स्थानीय तहलाई बालमैत्री शासनयुक्त बनाउने लक्ष्य लिएको छ ।
सोही अभियानअनुरूप मन्थली नगरले पाएको यो उपलब्धिले बालबालिका मात्र होइन, सम्पूर्ण नगरबासीलाई हर्षित बनाएको छ । तर यसको दिगोपना कसरी सुनिश्चित गर्ने भन्ने सवालमा अहम् छ ।
२०७९ पुस १० र ११ गते बसेको १२औँ नगरसभाले मन्थलीलाई बालमैत्री स्थानीय शासनयुक्त बनाउने निर्णय गर्यो । त्यसपछि २०८१ जेठ मसान्तभित्र घोषणा गर्ने प्रतिवद्धतापत्रमा हस्ताक्षर भयो ।
बालबालिकाको सर्वाङ्गीण विकासका लागि दुई वर्षदेखि विभिन्न कार्यक्रम सञ्चालन गरेपछि गत जेठ २८ गते नगरका सबै वडा बालमैत्री स्थानीय शासनयुक्त वडा घोषणा भए ।
मन्थली नगरमा २ सय बालसमूह, १४ वडामा वडास्तरीय र एउटा नगरस्तरीय बालसञ्जाल छन् । त्यसैगरि ५२ किशोरी समूह, १४ वडास्तरीय किशोरी समूह र एउटा नगरस्तरीय किशोरी वृत्त सक्रिय छन् ।
यसमार्फत ३ हजार ९६९ बालबालिकाले प्रत्यक्ष सहभागिता जनाइरहेका छन् । यस्ता संरचनाले बालबालिकाको सहभागिता अझै बढ्ने विश्वास छ । बालमैत्री स्थानीय शासनयुक्त नगरको दिगोपनाका लागि पाँच वर्षे रणनीतिक योजना तयार गरिएको नगरले जनाएको छ ।
बालबालिकाको सर्वाङ्गीण विकासका लागि भन्दै दुई वर्ष बढी समय विभिन्न कार्यक्रम सञ्चालन गरेपछि मन्थली नगरपालिका बालमैत्री स्थानीय शासनयुक्त बनेको छ । मन्थली नगर रामेछापमा पहिलो बालमैत्री स्थानीय शासनयुक्त पालिका बन्नु गौरवको कुरा भए पनि यसको दिगोपना सुनिश्चित गर्न विशेष योजनासँगै प्रभावकारी कार्यान्वयन आवश्यक देखिन्छ ।
