काठमाडौं । इंग्लिस प्रिमियर लिगअन्तर्गत लन्डन डर्बीमा चेल्सीले रेफ्रिको विवादास्पद निर्णयको फाइदा उठाउँदै फूलहमलाई २-० ले पराजित गरेको छ ।
स्ट्यामफोर्ड ब्रिजमा केहीबेर अघि सम्पन्न खेलमा चेल्सीका नयाँ स्ट्राइकर जोआओ पेद्रोले स्कोरिङलाई निरन्तरता दिँदा एन्जो फर्नान्डेजले पेनाल्टीमार्फत् गोल गरे।
२१औं मिनेटमा जोश किङले फुलहमका लागि गरेको गोल भिएआर समीक्षा पछि रद्द गरिएको थियो । उनका सहकर्मी रोड्रिगो मुनिजले टेभो चालोबाहमाथि खुट्टा टेकिएको ठहर भएसँगै रेफ्री रोबर्ट जोन्सले गोल अमान्य भएको संकेत गरेका थिए । रिप्लेमना सामान्य सम्पर्क मात्र देखिए पनि भीएआर अधिकारी माइकल सालिसबरीको सिफारिसमा निर्णय बदलिएको थियो ।
सुरुवातमा हाबी देखिएको फूलहमलाई त्यसपछि थप निराशा झेल्नु पर्यो । पहिलो हाफको अन्तिम क्षणमा एनजो फर्नान्डेजको कर्नरमा पेद्रोले हेडिङ गोल गर्दै चेल्सीलाई अग्रता दिलाए ।
दोस्रो हाफमा पनि विवादास्पद क्षण दोहोरियो । ५५औं मिनेटमा चालोबाहको क्रस रोकेका रायन सेसेगनको हातमा बल लागेको भन्दै चेल्सीलाई पेनाल्टी प्रदान गरियो । उक्त अवसरमा फर्नान्डेजले सजिलै गोल गर्दै स्कोर २-० बनाए ।
यो निर्णय कठिन देखिए पनि चेल्सीको पक्षमा गएको थियो । फूलहमका प्रशिक्षक मार्को सिल्भा रेफ्रिप्रति आक्रोशित बनेका थिए । यससँगै चेल्सीले अन्तर्राष्ट्रिय ब्रेकअघि महत्वपूर्ण जित हात पारेको छ ।
३ खेलमा ७ अंक जोडेको चेल्सी लिगको शीर्ष स्थानमा उक्लिएको छ । समान खेलमा २ अंक जोडेको फुलहम १४औं स्थानमा छ । प्रिमियर लिगमा अहिले उल्भ्स र एर्भटन, टोटनहम र बर्नमथ, म्यान्टेस्टर युनाइटेड र बर्नली तथा सन्डरल्यान्ड र ब्रेन्टफर्डबिचको खेल जारी छ ।
आजै राति सवा १० बजे लिड्स युनाइटेड र न्यूक्यासल प्रतिस्पर्धा गर्ने छन् । २०२५-२६ इंग्लिस प्रिमियर लिगको सम्पूर्ण सिजन कान्तिपुर म्यास र कान्तिपुर मिडिया ग्रुपका विभिन्न डिजिटल प्ल्यार्फममा प्रत्यक्ष प्रसारण भइरहेको छ ।
