विराटनगर/ कोशी प्रदेश सरकारले प्रदेश सभामा पेस गरेको “कोशी प्रदेश आमसञ्चार सम्बन्धमा व्यवस्था गर्न बनेको विधेयक” को विरोधमा पत्रकारहरुले धर्ना दिएका छन् ।
नेपाल पत्रकार महासंघ कोशी प्रदेशको घोषित चरणवद्द आन्दोलन अनुरुप बिहीवार तेस्रो दिन १४ वटै जिल्ला प्रशासन कार्यलयमा पत्रकारहरु धर्नामा बसेका हुन् । प्रेस स्वतन्त्रता र अभिव्यक्ति स्वतन्त्रता विरोधी विधेयक ल्याएर सरकारले प्रेस माथि अङ्कुश लगाउन खोजेको पत्रकारहरूको भनाई छ ।
दलको सदस्यता लिएको व्यक्ति पनि प्रेस रजिष्ट्रारमा नियुक्त हुनसक्ने प्रावधान विधेयकमा छ । यसरी नियुक्त भएको प्रेस रजिष्ट्रारले उजुरीको शुरुदेखि अन्तिम किनारासम्म लगाउन सक्ने र एक लाख रूपैयाँसम्म जरिवाना गर्न सक्ने जस्ता प्रावधान राखेर प्रेसलाई सरकारी नियन्त्रण गर्न खोजेको भन्दै कोशीका पत्रकारहरु आन्दोलित छन् ।
प्रेस स्वतन्त्रतालाई अङ्कुश लगाउने प्रावधान विधेयकबाट नहटाएसम्म निरन्तर आन्दोलनमा रहने महासंघ कोशी प्रदेश अध्यक्ष भरत खड्काले बताउनुभयो ।
