विराटनगर/ कोशी प्रदेश सरकारले प्रदेशसभामा पेस गरेको "कोशी प्रदेश आमसञ्चार सम्बन्धमा व्यवस्था गर्न बनेको विधेयक" को विरोधमा पत्रकारहरुले आइतवार विराटनगरमा प्रदर्शन गरेका छन् ।
प्रेस युनियन कोशी प्रदेशको आयोजनामा पत्रकारहरुले प्रदर्शन गरेका हुन् । विराटनगरको देवकोटा चोकदेखि हाटखोला चोकसम्म मुख र हातमा कालो पट्टी बाँधेका पत्रकारहरुले उल्टो हिँडेर विरोध गरेका छन् ।
प्रेस स्वतन्त्रता र अभिव्यक्ति स्वतन्त्रता विरोधी विधेयक ल्याएर सरकार उल्टो हिँडेको भन्दै पत्रकारहरुले विधेयकको विरोध गरेका हुन् । कुनै दलको सदस्यता लिएको व्यक्ति पनि प्रेस रजिष्ट्रारमा नियुक्त हुनसक्ने प्रावधान विधेयकमा छ । यसरी नियुक्त भएको प्रेस रजिष्ट्रारले उजुरीको शुरुदेखि अन्तिम किनारासम्म लगाउन सक्ने र एक लाख रूपैयाँसम्म जरिवाना गर्न सक्ने जस्ता प्रावधान राखेर प्रेसलाई सरकारी नियन्त्रण गर्न खोजेको भन्दै कोशीका पत्रकारहरु आन्दोलित छन् ।
प्रेस स्वतन्त्रतामा अङ्कुश लगाउने प्रावधान तत्काल हटाउन सञ्चारसम्वन्ध विभिन्न संगठनहरु यसअघिदेखिनै आन्दोलित छन् ।
