अछाम । राष्ट्रिय गौरवको त्रिदेशीय सडक सेती राजमार्गको काम निकै सुस्त छ ।
कैलालीको तीकुने नाकाबाट बौनिया, डोटी, अछाम, बाजुरा, बझाङको चैनपुर हुँदै तिब्बतको ताक्लाकोटसम्म जोड्ने यो राजमार्गको कामले गति लिन सकेको छैन । दक्षिणी खण्ड बौनियादेखि ठुलीगाडसम्म रूख कटानमा समस्या आउँदा निर्माणको काम ३ वर्ष अवरूद्ध भएको थियो । गत वर्ष मात्र रूख कटानको आदेश आएपछि निर्माणको काम अघि बढाइए पनि गति एकदमै सुस्त छ ।
सुदूरपश्चिम प्रदेशको विकासमा फड्को मार्ने अपेक्षा गरिएको राष्ट्रिय गौरवको आयोजना सेती राजमार्ग निर्माणले गति लिन सकेको छैन । दुईवटा कार्यालय स्थापना गरी २०७१ सालमा आयोजनाको ठेक्का भएको थियो । ३ सय ५५ किलोमिटर लम्बाई रहेको सेती राजमार्गको दुई खण्डमा निर्माण कार्य भइरहेको भए पनि निर्माण कार्य सुरूदेखि नै कछुवा गतिमा छ ।
कैलालीको तीकुने नाका हुँदै बौनियाबाट डोटी, अछाम, बाजुरा, बझाङको चैनपुर हुँदै यो सडक तिब्बतको ताक्लाकोटसम्म जोड्ने लक्ष्य छ । सेती राजमार्गको कैलाली डोटी अछाम र बाजुरामा पर्ने दक्षिणी खण्डको २०४ किलोमिटरमध्ये १४९ किलोमिटर ट्रयाक खालिएको छ भने ५५ किमी. ट्रयाक खोल्न बाँकी छ । अछाम खण्डको १२ किमी कालोपत्रे भइरहेको छ ।
अछाम र बझाङमा दुई कार्यालय स्थापना गरी काम थालिएको वर्षौ भयो तर कामले गति लिनसकेको छैन । भारत र चीन जोड्ने सेती राजमार्ग सुदूरपश्चिम प्रदेशको गेम चेन्जर आयोजना हो ।
संघीय सरकारले पर्याप्त बजेट नछुट्याउँदा कामले गति लिन नसकेको बताउँदै सुदूरपश्चिमका मुख्यमन्त्री कमलबहादुर शाहले आफुले प्रदेश सरकारको तर्फबाट सक्दो पहलमा लागेको बताउनुभयो ।
सेती राजमार्ग बनेमा अछामबाट धनगढीसम्मको करिब ३०० कि.मी.को लामो दूरी आधाले घट्नेछ । तर विकासका लागि भन्दा पनि कुर्सीका लागि गरिने राजनीतिले सुदूरको समृद्धिसँग जोडिएको योजना दशकौं देखि अलपत्र छ ।
