रामेछाप। तामाकोशी नदीको कटानले भासिएको पुष्पलाल राजमार्गअन्तर्गत रामेछापको मन्थली–खिम्ती सडक एकतर्फी सञ्चालनमा आएको छ।लिखु तामाकोशी–७ तिल्पुङस्थित हल्देबजार नजिकै करिब २० मिटर सडक बुधवार बिहानैदेखि भासिएपछि ठुला सवारी–आवागमन अवरुद्ध भएको थियो ।
सडक साँघुरो भएकाले अहिले एकतर्फी मात्र सञ्चालन भइरहेको जिल्ला प्रहरी कार्यालय रामेछापका प्रहरी निरीक्षक कौशल न्यौपानेले बताउनुभयो ।
गत वर्ष पनि सोही स्थानमा लेदो पसेर सडक बिग्रिएपछि जालीसहितको वाल उठाएर मर्मत गरिएको थियो । तर यस वर्ष तामाकोशी नदीको कटानले सडक भासिएको हो ।
सो सडक हुँदै रामेछापको उमाकुण्ड, गोकुलगङ्गा, लिखुतामाकोशी गाउँपालिका सहित दोलखाकाको सहरे, तामाकोशी र मेलुङ गाउँपालिका हुँदै काठमाडौँ जाने सार्वजनिक सवारी साधन चल्ने गर्छन् ।
