काठमाडौं । नेपाली राष्ट्रिय पुरुष क्रिकेट टिमका खेलाडीहरूको बुधबार सातदोबाटोस्थित स्पोर्टस साइन्स रिसर्च सेन्टर र हाई परफरमेन्स सेन्टरमा फिटनेस टेस्ट भएको छ ।
आइसीसी टी-२० विश्वकप छनोटको तयारीमा रहेको नेपाल टिमले अत्याधुनिक संरचनाको अनुगमन र परीक्षण गर्यो । खेलाडीको प्रदर्शनमा महत्वपूर्ण भूमिका निर्वाह गर्ने वैज्ञानिक परीक्षण अब नेपालमा नै उपलब्ध हुँदा खेलाडीमा उत्साह देखिएको छ ।
राष्ट्रिय पुरूष क्रिकेट टिम बिहीबार बिहान फिटनेस टेस्टका लागि सातदोबाटोस्थित स्पोर्ट्स साइन्स रिसर्च सेन्टर र हाई परफमेन्स सेन्टर पुगेको थियो । असार अन्तिम साता प्रधानमन्त्री केपी शर्मा ओलीले उद्घाटन गरेको सेन्टर अझै पूर्ण रुपमा सञ्चालनमा आइसकेको छैन । तर क्रिकेट खेलाडीले अस्ट्रेलिया भ्रमण गर्नु अघि सेन्टरमा पुगेर फिजिकल टेस्ट गरेका छन् । सोमपाल कामी, नन्दन यादव, गुल्सन झा, सन्दीप लामिछानेलगायतको फिटनेस परीक्षण भएको थियो ।
रिसर्च सेन्टरमा भीओटु म्याक्स अर्थात् खेलाडीको कार्डियो भास्कुलर इन्डुरेन्स कस्तो छ भनेर जाँच गरियो । यस्तै एक्स बडी अर्थात् शरीरको समग्र पोश्चर, मसल्स पावर तथा जोर्नीको अवस्थाबारे परीक्षण भएको थियो । यी परीक्षणले खेलाडीको शरीरमा रहेको बलियो पक्ष र कमेजारी पत्ता लगाउँछ । सोही अनुसार खेलाडीलाई प्रतियोगिताका लागि तयार पारिन्छ ।
यस अघिसम्म नेपाली खेलाडीले आधुनिक प्रविधिबाट फिटनेस परीक्षणको अवसर पाएका थिएनन् । परीक्षणबाट प्राप्त नतिजाले सम्बन्धित खेल संघलाई योजना बनाउन सहयोग गर्नेछ । राष्ट्रिय टिममा रहेका खेलाडीले सहजै निःशुल्क यो सुविधा लिन सक्नेछन् ।
नेपाली टिम आगामी सोमबार अस्ट्रेलिया जाँदैछ । अस्ट्रेलियन टप एन्ड टी-ट्वेन्टी सिरिजमा नेपालसहित ११ टिम सहभागी छन् । त्यसपछि नेपालले सेप्टेम्बरमा वेस्ट इन्डिजसँग सिरिज खेल्ने तालिका छ । दुबै सिरिज टी-२० विश्वकपको तयारी हुन् । महत्वपूर्ण प्रतियोगिताअघि खेलाडीको फिटनेस परिक्षण रिकभरीमा सहयोगी हुनेछ ।
