काठमाडौं । सशस्त्र प्रहरी बल, नेपालका महानिरीक्षक राजु अर्यालले राज्यको लगानी र नीतिमा विपद् प्राथमिकताको विषय नपरेसम्म विपद्जन्य क्षति न्युनीकरण प्रभावकारी बन्न नसक्ने बताउनुभएको छ ।
शुक्रबार सशस्त्र प्रहरी बल, नेपालले आयोजना गरेको विपद् सम्बन्धी अन्तरक्रिया एवं छलफल कार्यक्रममा बोल्दै उहाँले सरकारले विपद्सम्बन्धी विषयलाई प्राथमिकतामा नराखेसम्म क्षति न्युनीकरण गर्न नसकिने बताउनुभएको हो ।
उहाँले संविधानको रक्षा, मौलिक हकको रक्षा र मानव अधिकारको रक्षा गर्न पनि विपद् न्युनीकरणको विषयलाई प्राथमिकतामा राख्नुपर्ने बताउनु भयो । महानिरीक्षक अर्यालले नेपालमा वार्षिक रूपमा सबैभन्दा बढी मृत्यु विपद्जन्य घटनाबाट हुने गरेको उल्लेख गर्दै यसलाई गम्भीरताका साथ लिन आग्रह गर्नुभयो ।
विपद् न्युनीकरणको विषय राज्यको प्राथमिकतामा पर्न नसकेको उहाँले बताउनु भयो । विपद् न्युनीकरणका लागि सबै निकायहरूबीचमा समन्वय गरेर काम गर्न आवश्यक रहेको उहाँकाे भनाइ छ ।
महानिरीक्षक अर्यालले विपद्सम्बन्धी तालिम पार्टीगत वा अन्य जो कोही आएपनि गराउने प्रतिबद्धता जनाउनु भयो ।
