रोल्पा । अवैध रुपमा रूस पुगेर सेनामा कार्यरत रोल्पाका तिर्खबहादुर बुढाथोकीको मृत्यु भएको छ ।
पूर्वी रोल्पाको सुनछहरी गाउँपालिका-५ जैमा कसलाका ४४ वर्षीय बुढाथोकीको युक्रेनी सेनाको ड्रोन आक्रमणमा परेर गत फागुन २४ गते ज्यान गएको हो ।
बुढाथोकी अवैध रुपमा २०८० असोजमा रुसी सेनामा भर्ना हुन रुस पुग्नुभएको थियो । करिब डेढ वर्षदेखि रुसी सेनामा कार्यरत बुढाथोकीको बुवाआमा, श्रीमती, एक छोरी र एक छोरा छन् । तिर्खबहादुरको मृत्युको खबर पाएपछि परिवारले कुशको शव बनाएर अन्तिम संस्कार पूरा गरेको छ ।
बुढाथोकी २०७४ सालको स्थानीय तह निर्वाचनमा नेकपा एमालेबाट सुनछहरी गाउँपालिका-५ को वडाध्यक्षमा निर्वाचित हुनुभएको थियो । २०७९ सालको निर्वाचनमा पुनः वडा अध्यक्ष उम्मेदवार बने पनि पराजित भएपछि बुढाथोकी रुस गएको बताइएको छ ।
