काठमाडौं । कान्तिपुर टेलिभिजनका पर्सा संवाददाता पंकज श्रेष्ठ पुरस्कृत हुनुभएको छ ।
कान्तिपुर टेलिभिजनमा आवद्ध भएर समाचारको माध्यमबाट समाज परिवर्तनमा विगत दुई दशकदेखि पुर्याएको योगदानको कदर गर्दै उहाँलाई स्वर्गीय गोपाल स्मृति कृयाशिल पत्रकारिता पुरस्कारबाट पुरस्कृत गरिएको हो ।
नेपाल पत्रकार महासँघ पर्साले आयोजना गरेको पुरस्कार वितरण कार्यक्रममा कान्तिपुर टेलिभिजनकर्मी श्रेष्ठलाई मधेश प्रदेशका भूमी व्यवस्था, कृषि तथा सहकारी मन्त्री जनार्दन सिँह क्षेत्रीले पुरस्कार तथा सम्मान वितरण गर्नुभएको हो ।
आयोजक पत्रकार महासँघ पर्साले उहाँलाई ५१ हजार रुपैयाँ नगद पुरस्कार सहित कदरपत्रबाट सम्मान गरेको हो । राजनीति, पत्रकारिता र समाजसेवाको क्षेत्रमा जुझारु वीरगञ्जका गोपाल गिरीलाई २०६० साल माघ १ गते तत्कालिन माओवादीले हत्या गरेपछि उहाँको स्मृतिमा पत्रकार महासँघ पर्साले हरेक वर्ष एक जना पत्रकारलाई सम्मान गर्दै आएको छ ।
