पश्चिम नवलपरासी । विद्यालयमा भयरहित शिक्षा दिने अभियान चलेको धेरै भयो । तर, पश्चिम नवलपरासीको प्रतापपुरमा कक्षाभित्रै शिक्षकले लठ्ठीले हान्दा विद्यार्थीको आँखा नै फुटेको छ ।
पश्चिम नवलपरासीको प्रतापपुर गाउँपालिका-१ मा छ, एच पाठशाला । यसै पाठशालाका शिक्षक सन्जु चौधरीले प्लास्टिकको लठ्ठीले हान्दा यूकेजीमा पढ्ने ६ वर्षीय प्रशान्त चौधरीको देब्रे आँखा फुट्यो । गत मंसिर १८ गते कक्षामा पढाइरहेका बेला दुई विद्यार्थीबीचको विवाद छुट्याउन लठ्ठीले हान्दा आँखामा लागेको विद्यालय प्रशासनको भनाइ छ ।
घटनापछि विद्यालय प्रशासनले नै बालकलाई गोपीगन्ज बजारमा उपचारका लागि लगेको थियो । त्यहाँ उपचार सम्भव नभएपछि अभिभावकले परासी हुँदै रणअम्बिका आँखा अस्पताल भैरहवाबाट काठमाडौंको तिलगंगा आँखा अस्पताल पुर्याए । अस्पतालले मंसिर १९ गते शल्यक्रिया गरेर बाहिर निस्किएको नानीलाई भित्र त राखिदियो । तर चिकित्सकले नानी फुटेकाले बालकले आँखाले देख्न नसक्ने बताएको अभिभावक बताउँछन् ।
बालकको दाहिने आँखाले पनि राम्ररी देख्दैन । देब्रे आँखाको चोटले दाहिने आँखा पनि खोल्न र हेर्न नमिलेको हो । उपचारका लागि एक वर्ष लाग्ने जानकारी चिकित्सकबाट पाएका अभिभावकले हप्ताहप्तामा फलोअप गराइरहेका छन् ।
बालकका आफन्तले मंसिर १९ मा सेमरी प्रहरी चौकीमा उजुरी दिए । तर, प्रहरीले घटनाको प्रकृति थाहा नपाएको भन्दै जाहेरी लिएन । बालकको उपचारपछि फर्केका बाबु नरेन्द्रले पुस १६ गते शिक्षकको कुटपिटबाट छोराको अंगभंग भएको भन्दै तिलगंगा आाखा अस्पतालको उपचार प्रतिवेदन सहित इलाका प्रहरी कार्यालय बर्दघाट मार्फत उजुरी गर्नुभएको छ । प्रहरीले पुस १९ गते अदालतमा मुद्दा दायर गरी शिक्षक सन्जुलाई पक्राउ गर्न अनुमति लिएको छ । तर, अभियुक्त अझै पक्राउ परेका छैनन् ।
प्रहरीले अभियुक्त फेला नपरेको बताए पनि २० वर्षीय शिक्षक सन्जु स्नातक तहको परीक्षा दिन परासी बसेको स्थानीयको दाबी छ । घटनापछि शिक्षक सम्पर्कमा नआएको बताउने विद्यालयले बालकको निःशुल्क उपचार गरिदिने र निःशुल्क पढाउने प्रतिबद्धता सहित मुद्दा फिर्ता लिन दबाब दिइरहेको छ ।
अभिभावकहरू छोराको आँखा फुटाइदिने शिक्षकलाई कारबाहीसँगै बालकको नाममा केही रकम प्राप्त होओस् भन्ने आशमा छन् । प्रशान्तको जस्तै दुर्घटना हुन नदिन विद्यालयलाई कसरी भयरहित बनाउने भन्नेमा कसैको चासो छैन ।
