काठमाडौं । ललितपुरको बालकुमारीमा गएराति भएको आगलागीमा फार्मेसी, जुम्बा डान्स सेन्टर र केही पसल जलेर नस्ट भएका छन् । बालकुमारीस्थित सीसीआरसी कलेज नजिक स्वाभिमान श्रेष्ठको दुई तले घरमा विद्युत् चुहावट भएर आगलागी भएको हो ।
महानगरीय प्रहरी प्रभाग कोटेश्वरका अनुसार आगलागीबाट घरको पहिलो तलामा भोजराज भट्टले सञ्चालन गरेको ‘डगेरा फार्मेसी’ जलेर नष्ट भएको छ । एउटा पान पसल र मःम पसल पनि जलेर नष्ट भएको प्रहरीले जनाएको छ ।
आगलागीले सँगैको ‘जुम्बा डान्स सेन्टर’ पनि जलेर नष्ट भएको छ । आगो निभाउन काठमाडौंका तीन र ललितपुरका दुईवटा दमकलका साथै प्रहरी परिचालन गरिएको थियो।
