काठमाडौं । प्रधानन्यायाधीश प्रकाशमान सिंह राउतले आफु कसैको दबाब र प्रभावमा नपर्ने दाबी गर्नुभएको छ ।
आजबाट काठमाडौंमा सुरु भएको चौथो संस्करणको ‘कान्तिपुर कन्क्लेभ’ मा उद्घाटन मन्तव्य दिदै प्रधानन्यायाधीश राउतले न्यायपालिकामा सुधार आवश्यक रहेको भन्दै त्यसको जिम्मा आफुले लिने बताउनु भयो । त्यसका लागि नेतृत्व सक्षम र इमान्दार हुनुपर्ने उहाँको भनाइ थियो । उहाँले न्याय क्षेत्रको सुधारले मात्र समाजमा व्याप्त निराशा घटाउन सकिने बताउनुभयो ।
कन्क्लेभको उद्घाटन गर्दै कान्तिपुर मिडिया ग्रुपका अध्यक्ष कैलाश सिरोहियाले लोकतान्त्रिक आयाममाथि थपिएका चुनौतीमाथि सार्थक बहस गरि लोकतन्त्रलाई मजबुत बनाउन कार्यक्रमको आयोजना गरिएको बताउनुभयो ।
नोबेल शान्ति पुरस्कार विजेता भारतका कैलाश सत्यार्थीले ‘की–नोट स्पिच’ दिदैं बदलिदो परिवेशमा मतदातालाई प्रभावित पार्ने ‘पपुलिजम’को लहर विश्वभर नै चलेको बताउनुभयो । उहाँले यसले समग्र लोकतान्त्रिक अभ्यासलाई प्रभावित बनाएको बताउनुभयो ।
कन्क्लेभको पहिलो दिन आज ‘दोबाटोमा लोकतन्त्र’, ‘नीति र समृद्धि’, ‘लोकरिझ्याइँको लहर’, ‘सामाजिक सञ्जाल : दुईधारे तरबार’, ‘कलम र शक्ति : नेपाली लोकतन्त्र र पत्रकारिताका तीन दशक’ र ‘प्रचण्डपथ : सडक कि सत्ता?’ शीर्षकमा बहस हुनेछन्।
दोस्रो दिन भोलि बिहीबार ‘निर्वाचन सुधार : नीति कि प्रवृत्ति?’, ‘भूराजनीतिक खलबल’, ‘मैदानमा महिला नायक’, ‘सीमापार समृद्धि’, ‘मुख्यमन्त्रीका मुख्य मुद्दा’ र ‘प्रधानमन्त्रीसँग परिसंवाद’ शीर्षकका सत्र रहेका छन्।
एनआईसी एसिया बैंकको मुख्य प्रायोजन र एसियन पेन्ट्सको सहप्रायोजन हुने बहसका १२ सत्रमा १० विदेशीसहित ५५ वक्ता रहनेछन्।
