पाँचथर । पाँचथरको फिदिम नगरपालिका-२ साम्दिनमा घरमा आगलागी हुँदा एकजना घाइते भएका छन् । मंगलबार दिउँसो सवा चार बजे अचानक आगलागी हुँदा ६२ बर्षीय जयप्रकाश राई घाइते भएको जिल्ला प्रहरी कार्यालय पाँचथरका सूचना अधिकारी बेनिलाल साहले बताउनुभयो ।
आगलागी भएको घर स्थानीय कुमारी राईको रहेको प्रहरीले जनाएको छ । बिरामी जयप्रकाश घरमा सुतिरहेको अवस्थामा आगलागी भएको थियो । आगोमा जलेर उनको अवस्था गम्भीर रहेकाले पाँचथर अस्पतालबाट थप उपचारका लागि उनलाई झापातर्फ पठाइएको पनि साहले बताउनुभयो ।
आगलागीको कारण खुल्न नसके पनि घर भित्रको ग्यास पड्किएकाले ग्यास लिक भएरै आगो लागेको हुनसक्ने प्रारम्भिक अनुमान गरिएको प्रहरीले जनाएको छ । आगो स्थानीय नागरिक, नेपाल आर्मी, नेपाल प्रहरी र सशस्त्र प्रहरीसहित फिदिम नगरपालिकाका दुईवटा दमकलको मद्दतले साँझ साढे पाँचबजे नियन्त्रणमा लिइएको छ ।क्षतिको विवरण आउन समय लाग्ने प्रहरीले जनाएको छ ।
