नुवाकोट । नुवाकोटको विदुर नगरपालिकाले फूल खेती गरी विक्री वितरणको व्यवस्था मिलाएको छ ।
घर सजावटमा प्रयोग गरिने प्लाष्टिकजन्य कृत्रिम फूलको बढ्दो प्रयोगलाई नियन्त्रण गर्ने र दिपावली, तिहार र छठजस्ता पर्वहरुमा आवश्यक प्राकृतिक फूलहरुको आपूर्तिमा सघाउ पुर्याउने उद्देश्यले विदुर नगरपालिका फूल खेती गरेको हो । सयपत्री र मखमली जातका प्राकृतिक फूलहरुको उत्पादन गरी सहज र सुलभ रुपमा उपलब्ध गराएको नगरपालिकाले जनाएको छ।
संघीय सरकारले पर्यावरणमा असर पुगेको र प्राकृतिक फूलहरुको उत्पादन र बजार प्रवर्द्धनमा समस्या देखिएसँगै प्लाष्टिकजन्य कृत्रिम फुल तथा मालाहरुको आयात र विक्रीवितरणमा रोक लगाएको थियो ।
उक्त सरकारी नीतिको अनुशरण गर्दै विदुर नगरपालिकाको कृषि शाखाद्धारा वडा-५ र ९ को कार्यालय परिसरमा रहेको करिब १० रोपनी जग्गामा फूल खेती गरेको हो । उत्पादित फूल प्रतिकेजी दुई सय रुपैयाँमा विक्री वितरण भइरहेको नगरपालिकाले जनाएको छ ।
