काठमाडौं । भारतबाट काठमाडौं आएको भिस्तारा एयरलायन्सको जहाजमा बम राखिएको हल्ला निराधार भएको सुरक्षा निकायले जनाएका छन् ।
त्रिभुवन अन्तर्राष्ट्रिय विमानलस्थलका प्रहरी वरिष्ठ उपरीक्षक डम्बर विकका अनुसार भारतबाट आएको भिस्तारा एयरको जहाजमा बम राखिएको हल्लापछि सुरक्षा जाँच गरिएको थियो ।
१ सय ४७ जना यात्रु र १० जना चालक दलका सदस्यसहित १ सय ५७ जना रहेको जहाजमा नेपाली सेना र नेपाल प्रहरीले संयुक्त जाँच गरेको थियो । नेपाली सेनाको बम डिस्पोजल टोलीसहितले जहाजको सबै भाग र यात्रुको जाँच गरेको थियो ।
सबैको सुरक्षा जाँचपछि केही नभेटिएपछि यात्रुहरु गन्तव्यतर्फ गएको एसएसपी विकले जानकारी दिनुभयो । एक सातादेखि भारतीय विमानमा बम हल्लाले सुरक्षा चुनौति दिइरहेको छ । एक सातामा भारतीय जहाजमा बम राखिएको भन्दै १ सय ७० वटा सूचना आएका थिए ।