काठमाडौं । संस्कृति, पर्यटन तथा नागरिक उड्डयनमन्त्री बद्री पाण्डेले त्रिभुवन अन्तर्राष्ट्रिय विमानस्थलमा यात्रुलाई दिने सेवामा थप सुधार गर्न मातहतका निकायलाई निर्देशन दिनुभएको छ ।
विमानस्थल व्यवस्थापन, नेपाल नागरिक उड्डयन प्राधिकरण, निजी क्षेत्रका सेवा प्रदायक संस्था, सुरक्षाकर्मीलगायतसँग आज छलफल गर्दै मन्त्री पाण्डेले सेवामा थप सुधार गर्न सचेत गराउनु हो ।
नेपालको पर्यटन क्षेत्रको विकासका लागि विमानस्थलमा आउने यात्रु शक्तिशाली सन्देशवाहक भएको भन्दै उहाँले उनीहरुलाई दिने थप सेवामा कमी हुन नदिन ध्यानाकर्षण गराउनुभयो । विमानस्थलको सेवामा भोलिदेखि नै सुधारका संकेत देखिनुपर्ने उहाँको भनाइ थियो ।
मन्त्री पाण्डेले चाडबाडको समयमा एकतर्फी भाडामा काम गर्नुपर्ने व्यवसायीको मर्का आफूले बुझेको पनि बताउनुभयो । हवाई उड्डयनको क्षेत्रमा धेरै काम गर्नुपर्ने अवस्था रहेको उहाँको भनाइ थियो ।
