रामेछाप । दोलखा हुँदै वैकल्पिक राजमार्गका रुपमा रहेको पुष्पलाल मार्ग मन्थली-चरिकोट-काठमाडौं बाइपास सडक खुलाइएपछि रामेछापको जनजीवन सामान्यतर्फ उन्मुख भएको छ ।
दोलखाको किर्नेटारस्थित खिम्ती जलविद्युत आयोजनास्थलबाट बाइपास सडक खुलेसँगै दशैँमा घर जान र आउन सहज भएको छ । यो सडक खुलेसँगै रामेछाप, ओखलढुङगा, सोलुखुम्बु, सिन्धुलीलगायतका जिल्ला जाने सवारीसाधन अब दोलखाबाट सिन्धुपाल्चोक निस्केर काठमाडौ आवातजावत गर्न थालेका छन् ।
खुर्कोटको पुल बाढीले बगाएपछि अहिले रामेछापलाई तराइ जोड्न मन्थली-सित्खा-खुर्कोट-बर्दीबास सडक सञ्चालन गरिएको छ । यो सडकबाट रामेछाप र दोलाखाका लागि खाद्यान्न, पेट्रोलियम पदार्थलगायतका अत्यावश्यक सामग्री बोकेका ढुवानीका साधनहरु आवतजावत गरिरहेका छन् ।
मध्यपहाडी राजमार्गको घुर्मी-खुर्कोट सडकखण्ड पनि आजैदेखि खुलाउने गरी काम भइरहेको छ । यो राजमार्ग खुलेपछि भोजपुर, ओखलढुङगा सोलुखुम्बुलगायतका जिल्लाका सवारीसाधन पनि सञ्चालनमा आउनेछन् ।
