पोखरा । पोखरामा राष्ट्रिय स्वतन्त्र पार्टीका सभापति रवि लामिछाने सहभागी कार्यक्रम स्थलबाहिर सहकारी पीडितहरूले प्रदर्शन र नाराबाजी गरेका छन् ।
पोखरा-१७ विरौटास्थित ग्यालेक्सी पार्टी प्यालेसमा आज आयोजित रास्वपाको गण्डकी प्रदेशस्तरीय विस्तारित बैठकलाई सम्बोधन गर्न गएका पूर्वगृहमन्त्रीसमेत रहेका लामिछानेविरुद्ध सूर्यदर्शन सहकारीका बचतकर्ताले कालो झन्डा देखाउँदै विरोध प्रदर्शन गरेका हुन् । कार्यक्रमस्थल बाहिर सहकारीपीडितले प्रदर्शन गरेपछि लामिछानेलाई सुरक्षा दिएर कार्यक्रम हलभित्र लगिएको थियो । पीडितले गोर्खा मिडियामा सूर्यदर्शन सहकारीबाट लगिएको रकम फिर्ता गर्न माग गरेका छन् ।
लामिछानेविरुद्ध पीडितहरूले कास्की प्रहरीमा पूरक जाहेरी दिएका थिए । सूर्यदर्शन लगायत देशका विभिन्न सहकारीको रकम लामिछाने प्रबन्ध निर्देशक एवम सेयर सदस्य रहेको ग्यालेक्सी टेलिभिजनमा लगानी गरिएको थियो ।
सूर्यदर्शन सहकारी ठगी प्रकरणमा गोर्खा मिडिया नेटवर्कका अध्यक्ष जीबी राईसहित सहकारीका पूर्व र वर्तमान सञ्चालक तथा कर्मचारी गरी १९ जनालाई प्रतिवादी बनाएर प्रहरीले १ अर्ब ११ करोड रुपैयाँ बिगो मागदाबीसहित २०८० असोज १८ मा कास्की जिल्ला अदालतमा मुद्दा दायर गरेको छ।