काठमाडौं । काठमाडौं महानगरपालिकाका प्रमुख बालेन्द्र शाहले सम्पदा संरक्षण र पर्यटनमैत्री संरचना निर्माणलाई प्राथमिकता दिइएको बताउनु भएको छ ।
काठमाडौं महानगरपालिका- ८ को प्रशासनिक भवन उद्घाटन गर्दै प्रमुख शाहले आफूले धेरै बोल्नेभन्दा पनि काम गर्ने बताउनुभयो । कार्यक्रमहरूमा लामो सम्बोधन र भाषण गरेर समय लिनेभन्दा काममा समय दिनुपर्ने उहाँको भनाइ छ ।
पशुपति क्षेत्र आफैँमा सम्पदा स्थल भएको बताउँदै उहाँले सम्पदामैत्री सडक र घर तथा भवनहरू बनाउनको लागि काठमाडौं महानगरले बजेट समेत व्यवस्था गरेको जानकारी दिनुभयो ।
कार्यक्रममा उपप्रमुख सुनिता डंगोलले काठमाडौं महानगरका बस्तीहरूलाई सांस्कृतिक र पुरातात्त्विक तथा पर्यटकीय आकर्षणको केन्द्र बनाउनेतर्फ ध्यान दिनुपर्ने बताउनुभयो ।
