विराटनगर । मोरङको रतुवामाईबाट ब्राउन सुगर (खैरो हेरोइन)को कारोबारीलाई प्रहरीले गोली चलाएर पक्राउ गरेको छ । लागुऔषध नियन्त्रण ब्युरो काठमाडौंबाट खटिएको टोलीले ब्राउन सुगरका कारोबारीलाई नियन्त्रणमा लिन रतुवामाई नगरपालिका-६ मा आज (मंगलबार) दिउँसो ३ बजेतिर गोली चलाएको हो ।
भारतको किसनगञ्ज-८ घर बताउने ३४ वर्षीय भगीरथ हरिजनलाई पक्राउ गरेको मोरङ प्रहरी प्रमुख एसपी नवराज कार्कीले जानकारी दिनुभयो । हरिजनलाई नियन्त्रणमा लिने क्रममा प्रहरीलाई नै आक्रमण गरेपछि प्रहरीले २ राउन्ड गोली फायर गरेको जनाएको छ । उनको दाहिने तीघ्रामा गोली लागेको छ । शंकास्पद अवस्थामा भेटिएका उनलाई प्रहरीले पिछा गरेको थियो । हरिजनलाई बीआर ३८ क्यू ३८३० नम्बरको मोटरसाइकलमा भाग्दै गर्दा प्रहरीले नियन्त्रणमा लिन खोजेको थियो ।
तर, प्रहरीमाथि आक्रमणमा उत्रिएपछि प्रहरी गोली चलाउन बाध्य भएको बताइएको छ । घाइते अवस्थाका हरिजनलाई उपचारका लागि अरनिको अस्पताल उर्लाबारी लगिएको छ । उनको साथबाट ब्राउन सुगरजस्तो देखिने १ सय ५८ ग्राम धुलो पदार्थ (प्लाष्टिकसहित) बरामद भएको प्रहरीले जनाएको छ । हरिजनलाई नियन्त्रणमा लिने क्रममा प्रहरी सहायक निरीक्षक नवीन साही सामान्य घाइते हुनुभएको छ । घटनाका सम्बन्धमा थप अनुसन्धान भइरहेको एसपी कार्कीले बताउनुभयो ।
