धनुषा । जिल्ला प्रशासन कार्यालय धनुषाले अतिक्रमणमा परेका सरकारी र सार्वजनिक जग्गा खाली गर्न निर्देशन दिएको छ ।
धनुषाका प्रमुख जिल्ला अधिकारी चक्रपाणि पाण्डेले सरकारी, गुठी संस्थान लगायतका सार्वजनिक जग्गा अतिक्रमण गरी भोगचलन गर्दै आएकाहरुलाई जग्गा खाली गर्न निर्देशन जारी गरिएको बताएका छन् ।
सार्वजनिक जग्गाको दुरुपयोग र बिक्री-वितरण गर्ने, धितो बन्धक राख्नेलगायत पाइएमा कानुनबमोजिम कारबाही गरिने जारी सूचनामा उल्लेख छ । जिल्लामा रहेका सरकारी, ऐलानी, पर्ती, मठ-मन्दिरलगायत सार्वजनिक जग्गा अतिक्रमण गरी निजी प्रयोजनमा ल्याएका व्यक्तिबारे १० दिनभित्र जानकारी गराउनसमेत जिल्ला प्रशासनले आग्रह गरेको छ ।