महोत्तरी । स्रोत नखुलेको ८ लाख रुपैयाँसहित महोत्तरीबाट दुईजनालाई सशस्त्र प्रहरीले नियन्त्रणमा लिएको छ ।
पक्राउ पर्ने सम्सी गाउँपालिका- ३ बस्ने २८ वर्षीय रमेशकुमार साह र रामगोपालपुर नगरपालिका, सहसौला बस्ने ३२ वर्षीय अनिल चौधरी रहेको जनाइएको छ ।
भारतबाट नेपालतर्फ आउँदै गरेको अवस्थामा दुवै जनालाई सम्सी गाउँपालिका-५ पोखरभिण्डा सीमा इलाकामा स्रोत नखुलेको रकमसहित पक्राउ गरिएको सशस्त्र प्रहरी बल, नेपाल नं. ९ गण महोत्तरीले जानकारी दिएको छ ।
भारतबाट नेपालतर्फ आउँदै गरेको मधेश प्रदेश ०२-००६प-१६२१ नम्बर प्लेटको मोटरसाइकल रोकेर जाँच गर्दा ८ लाख १० हजार रुपैयाँ भेटिएको र त्यसको स्रोत खुलाउन नसक्दा पक्राउ गरिएको सशस्त्र प्रहरीले जनाएको छ ।
पक्राउ परेका व्यक्ति, मोटरसाइकल र २ वटा मोबाइल अनुसन्धानको लागि जलेश्वर भन्सार कार्यालयमा बुझाइएको सशस्त्र प्रहरी बल, नेपाल नं. ९ गण महोत्तरीले जनाएको हो ।
