काठमाडौं । बढदो शहरीकरण र आधुनिक परिवेशमा हुर्कँदै गरेका नयाँ पुस्तालाई संस्कृतिप्रति परिचित गराउन मैथिल महिलाहरुले राजधानीमा जितिया महोत्सव गरेका छन् । लोपोन्मुख नाच र लोकगीतको संरक्षणको उद्देश्यले जितियाको अवसर पारेर राजधानीमा कार्यक्रम गरिएको हो ।
मिथिलाञ्चलमा वैवाहिक तथा सांस्कृतिक अवसरमा प्रयोग हुने सामग्रीको प्रदर्शन गर्दै जितिया महोत्सव गरिएको हो । यसले नयाँ पुस्तालाई जीवन्त संस्कृतिसँग परिचय गराउने महोत्तरीकी अर्चना झाले जनाइन् ।
झा भन्छिन्, ‘विवाह प्रयोग हुने कतिपय सामग्रीहरु पाउनौं छाडेका छन् । यहाँ झाँकी जस्तो गरेर ती सामाग्रीका बारेमा जानकारी दिन खोजिएको छ ।’
महोत्सवमा जितिया पर्वमा व्रत बस्नुअघि खाइने माछा, कोदोको रोटी, माटाका परम्परागत भाँडा प्रदर्शनमा राखिएको थियो ।
कार्यक्रममा पारम्परिक मैथिली, भगवती गीत, झिझिया नृत्यलगायत प्रस्तुत गरिएको थियो । सखीबहिनपा नामक संस्थाले गरेको कार्यक्रममा मैथिली भाषा, संस्कृतिको संरक्षणमा योगदान गर्ने महिलालाई सम्मानसमेत गरिएको थियो ।
तराई-मधेसका जिल्लामा महिलाले सन्तानको भलो र उन्नतिको कामना गर्दै जितियाको निराहार व्रत बस्ने चलन छ । यस वर्ष असोज २० गते जितिया पर्व मनाइने भएको छ ।
