काठमाडौं । त्रिभुवन अन्तर्राष्ट्रिय विमानस्थल भन्सारबाट ‘ब्रेक शु’को स्वरुपमा भित्रिएको ६० किलो अवैध सुन प्रकरणमा प्रहरीको केन्द्रीय अनुसन्धान ब्युरो (सीआईबी)ले ५० जनालाई प्रतिवदी बनाउन सरकारी वकिलको कार्यालयलाई राय दिएको छ ।
सीआईबीले २७ नेपाली र २३ विदेशी नागरिकलाई प्रतिवदी बनाउन रायसहित आजै सरकारी वकिलको कार्यालयलाई अनुसन्धान प्रतिवेदन बुझाउने तयारी गरेको हो । प्रतिवेदनमा आरोपीमाथि तीन अर्ब बिगो माग दाबी गर्न राय दिइएको सीआईबी स्रोतले कान्तिपुर टेलिभिजनलाई जानकारी दियो ।
स्रोतका अनुसार यस गिरोहबाट ३६२ किलोग्राम सुन तस्करी भएको खुलेको छ । अबको केहीबेरमा प्रतिवेदन बुझाउने सीआईबीको तयारी छ ।
यस प्रकरणमा अहिलेसम्म ३२ जना पक्राउ परेका छन् भने १८ जना फरार छन् । फरारमध्ये १४ विदेशी र चार नेपाली हुन् ।
गत साउन ४ गते सिनामंगलबाट ब्रेक शुमा लुकाएर ल्याएको अवैध सुन राजस्व अनुसन्धान विभागले बरामद गरेको थियो । सुरुमा १८ दिन आफैँले अनुसन्धान गरेको राजस्वले त्यसपछि सीआईबीलाई सुम्पेको थियो ।
