काठमाडौं । काठमाडौं उपत्यकामा बिहानैदेखि वर्षा भएपछि बागमतीको सहायक नदीहरुमा जलसतह बढ्दै गएको छ ।
जल तथा मौसम विज्ञान विभागको बाढी पूर्वानुमान महाशाखाले मनोहरा, हनुमन्तेलगायतमा जलसतह बढ्दै गएको जनाएको हो ।
महाशाखाले मनोहरा, बालकुमारी जलमापन केन्द्रमा जलसतह सतर्कता नजिक पुगेको जनाएको छ ।
साथै मनोहरा, हनुमन्ते आसपासका डुबान हुने बस्तीमा रहने तथा नदी किनारको सडक भई यात्रा गर्नेहरुलाई सतर्कता अपनाउन आग्रह गरेको छ । बिहानैदेखि काठमाडौंका विभिन्न स्थानमा वर्षा भइरहेको छ ।
यस्तै महाशाखाले सिन्धुपाल्चोकको धापस्थित वर्षा मापन केन्द्रमा भारी वर्षा मापन भएको जनाएको छ ।
मेलम्ची र इन्द्रावती नदीमा बहाव बढ्ने सम्भावना भएकाले मेलम्ची बजारलगयात तल्लो तटीय क्षेत्रमा उच्च सतर्कता अपनाउन महाशाखाले आग्रह गरेको छ ।
