काठमाडौं । राष्ट्रपति रामचन्द्र पौडेल कारकेड नलिई काठमाडौंको वसन्तपुरस्थित कुमारी दर्शनका लागि कुमारी घर पुगेका छन् ।
राष्ट्रपति पौडेलले शनिबार अपराह्न पहिलोपटक कुमारी घरमा दर्शन गर्न जाने क्रममा सडक खाली गराएर मात्रै सवारी हुने परम्परा तोडेका हुन् । कारकेडबिनै उनले त्यहाँ पुगेर कुमारीको दर्शन गरे ।
त्यसक्रममा सर्वसाधारणको सवारीलाई सुरक्षाकर्मीहरुले रोक्ने काम गरेका थिएनन् । राष्ट्रपतिको कारकेटसहितको सुरक्षाका कारण सडकमा सर्वसाधारणले सास्ती व्यहोर्नुपरिरहेका बेला पौडेलले कारकेडबिनै त्यहाँ पुगे ।
राष्ट्रपतिमा निर्वाचित भएपछि पशुपतिनाथको दर्शन गर्न जाँदा सडक जाम भई उनको आलोचना गरिएको थियो । पौडेल गत फागुन २५ गते राष्ट्रपतिमा निर्वाचित भएका हुन् ।
