काठमाडौं । अमेरिकी राष्ट्रपति डनल्ड ट्रम्पद्वारा घोषणा गरिएको ट्यारिफको जवाफमा चीनले चालेको कदमले विश्व सेयर बजारमा उथलपुथल झन् गहिरिएको छ । यसले दीर्घकालीन व्यापार युद्ध र विश्व अर्थतन्त्रमा क्षति पुग्ने सम्भावना बढाएको छ।
हिजो अमेरिकाका सबै तीन प्रमुख शेयर सूचकांकहरू ५ प्रतिशतभन्दा धेरैले घटे । सन् २०२० यता अमेरिकाको सेयर बजारका लागि यो सबैभन्दा खराब साता हो । बेलायती शेयर बजारको सूचकांक झन्डै ५ प्रतिशतले घट्यो, जुन पाँच वर्षयताकै सबैभन्दा ठूलो गिरावट हो ।
यस्तै एशियाली, जर्मनी तथा फ्रान्सका स्टक एक्सचेञ्जहरूले पनि यस्तै गिरावटको सामना गरेका छन् । विश्व व्यापार प्रणालीलाई पुनः निर्माण गर्ने वाचा गरेका ट्रम्पले, बजारमा आएको झट्काको चिन्ता लिन जरूरी नभएको र अमेरिकी श्रम बजार अझै बलियो रहेको बताउनुभएको छ ।
ट्रम्पले विश्वका सबै देशहरूबाट आयात गरिने सामानमा नयाँ १० प्रतिशत आयात कर घोषणा गरेपछि विश्व सेयर बजारले खर्बौको मूल्य गुमाइसकेको छ। विश्लेषकहरूका अनुसार ट्रम्पका कारण सन् १९६८ यताकै सबैभन्दा ठूलो कर वृद्धि हो ।
यसले व्यापारमा संकुचन ल्याउने चेतावनी विश्लेषकहरूले दिएका छन् । अमेरिकी कर नीतिले धेरै देशहरूलाई आर्थिक मन्दीमा धकेल्न सक्छ भन्ने आशंका पनि विज्ञले व्यक्त गरेका छन्।
