काठमाडौं । प्रधानमन्त्री केपी शर्मा ओलीले नेपाल र भारतबीच रहेका असमझदारीलाई आपसी संवादमार्फत टुंग्याउने समझदारी भएको भएको बताउनुभएको छ । थाइल्यान्डको औपचारिक भ्रमण र बिमस्टेकको छैटौं शिखर सम्मेलनमा भाग लिएर स्वदेश फर्किएपछि त्रिभुवन विमानस्थलमा सञ्चारकर्मीसँग कुरा गर्दै प्रधानमन्त्री ओलीले भारतका समकक्षी नरेन्द्र मोदीसँग साइडलाइनमा भएको वार्ताका क्रममा आपसी समस्या संवादमार्फत समाधान गर्ने समझदारी भएको बताउनुभएको हो । मोदी र प्रधानम्नत्री ओलीबीच हिजो एक्लाएक्लै भेटवार्ता भएको थियो ।
“हामीले एउटा अठोट गरेका छौं, नेपाल—भारत सम्बन्धलाई अझ व्यापक विस्तृत, सुदृढ गर्दै लैजाने र कुनै सानातिना छिमेकमा समस्या देखिन सक्छन्, त्यस्तो तत्काल कुराकानी गर्ने र टुंग्याउने भन्ने कुरा हामीले गहिरो समझदारी गरेका छौं”, प्रधानमन्त्री ओलीले भन्नुभयो ।
प्रधानमन्त्री ओलीले आफ्नो भारत भ्रमण असम्भव नरहेको उल्लेख गर्दै विगतमा कतिपय कारणले नभ्याएको स्थिति रहेको बताउनुभयो । भ्याएको अवस्थामा सगरमाथा संवादअघि नै भारत भ्रमण हुन सक्ने पनि उहाँको भनाइ छ ।
तर नेपालले आयोजना गर्ने सगरमाथा संवादमा आउन नसक्ने जानकारी भारतीय समकक्षी मोदीले दिएको पनि प्रधानमन्त्री ओलीले बताउनुभयो । तर उक्त कार्यक्रममा भारतबाट उच्चस्तरको सहभागिता रहने उहाँको भनाइ छ । मोदीसँगको वार्ताका क्रममा पारस्परिक सहयोगका साथै लगानी, व्यापार, पञ्चेश्वर, दोधारा-चाँदनीमा सिँचाइ लगायतका विषयमा छलफल भएको पनि उहाँले जानकारी दिनुभयो । मोदीसँगको भेट निकै फलदायी भएको र आफू खुशी भएको प्रतिक्रिया उहाँले दिनुभयो ।
अर्को प्रसंगमा प्रधानमन्त्री ओलीले चैत १५ गतेको हिंसात्मक घटनाको निष्पक्ष छानबिन हुने बताउनुभएको छ । न्यायिक समिति सबै घटनामा आवश्यक नरहेको उल्लेख गर्दै उहाँले न्यायिक समिति बनाउने-नबनाउने भन्ने विषयमा विचार गरिने बताउनुभयो ।
अहिले देशभरका शिक्षकहरू विद्यालय शिक्षा विधेयक छिटो जारी गर्न माग गर्दै काठमाडौं केन्द्रित आन्दोलन गरिरहेका छन् । उहाँले शिक्षकहरूको समस्या समाधान गरिने पनि बताउनुभयो । प्रधानमन्त्री ओलीले बिमस्टेक बैठकको साइडलाइनमा भारतीय प्रधानमन्त्री मोदीका साथै भुटान, म्यानमार र श्रीलंकाका प्रधानमन्त्रीसँग पनि भेटवार्ता गर्नुभएको थियो ।
यस्तै थाइल्यान्डको औपचारिक भ्रमणका क्रममा आपसी सम्बन्धलाई सुदृढ गर्ने, व्यापारिक सम्झौता,सांस्कृतिक सहयोग लगायतका सम्झौता भएको पनि उहाँले बताउनुभयो ।
