काठमाडौं । इजरायली सेनाले इजिप्टसँग सीमा जोडिएको गाजाको दक्षिणी शहर रफाहमा गएरातिदेखि भीषण स्थल कारबाही शुरु गरेको छ ।
इजरायली सेनाले शुरु गरेको कारवाहीबारे आज विहान विज्ञप्ति जारी गर्दै इजरायली रक्षामन्त्री इजरायल काट्जले गाजामा आफ्नो सेनाले स्थल कारवाही विस्तार गर्ने र ठूलो भूभागलाई सुरक्षा क्षेत्रका रुपमा नियन्त्रणमा लिने घोषणा गर्नुभएको छ । काट्जले अपरेशन 'स्ट्रेन्थ एन्ड सोर्ड' नाम दिइएको सो विस्तारित कारवाहीको उद्देश्य आतंककारी र त्यसका संरचनालाई ध्वस्त पार्नु रहेको बताउनुभएको छ ।
यस क्रमका सो क्षेत्रमा बसोबास गर्दै आएका प्यालेष्टिनीलाई ठूलो संख्यामा हटाउनुपर्ने बताउनु भएको छ । इजरायली सेनाले सोमबार नै रफाह शहरका वासिन्दालाई उक्त क्षेत्र खाली गर्न आदेश दिइसकेको थियो । काट्जले गाजाका वासिन्दालाई हमासलाई सत्ताबाट हटाउन र सबै बन्धकलाई फिर्ता गर्न आह्वानसमेत गर्नुभएको छ । इजरायली सेनाले गाजामा शुरु गरेको नयाँ स्थल सैन्य कारवाही गत मार्च १८ मा इजरायली सेनाले गाजामाथि पुनः आक्रमण शुरु गरेयताकै सबैभन्दा ठुलो कारवाही हो ।
यसैबीच, इजरायली सेनाले गाजामा शुरु गरेको नयाँ स्थल कारवाहीको बन्धक तथा वेपत्ता परिवार मञ्चले आलोचना गरेको छ । मञ्चले रक्षामन्त्री काट्जमाथि भूक्षेत्र विस्तारका लागि बन्धकको बलिदानी दिन लागेको आरोप लगाएको छ । हमाससँग सम्झौता गरेर बन्धक रिहा र युद्ध अन्त्य गर्नुको साटो सरकारले बारम्बार लड्दै आएको भूभागमा फेरी लड्नका लागि थप सेना पठाएको आरोप बन्धक तथा वेपत्ता परिवार मञ्चले लगाएकोछ ।
इजरायल र हमासबीच जनवरी १९ मा शुरु भएको गाजा युद्धविराम सम्झौता मार्च १८मा भाँडिएको थियो । हमासमाथि युद्धविरामको अवधि लम्ब्याउन अमेरिकाले राखेको प्रस्ताव अस्वीकार गरेको आरोप लगाउँदै इजरायलले गाजामा मार्च १८ मा भीषण आक्रमण शुरु गरेको थियो ।
उता, इजरायलले गत मार्च २ देखि नै गाजामा सहायता सामग्री प्रवेशमा रोक लगाएका कारण पछिल्ला हप्तामा त्यहाँको मानवीय अवस्था दुरुह भएको जनाइएको छ । इजरायली आक्रमणमा गाजामा अहिलेसम्म ५० हजार ३ सय ९९ भन्दा बढी प्यालेष्टिनी मारिइसकेका छन् ।
