काठमाडौं । हाइटीमा दुई गिरोहबीच गोली हानाहान हुँदा कम्तीमा ७० जनाको मृत्यु भएको छ । पोन्ट सोन्डे सहरमा भएको गोलीकाण्डमा तीन शिशु र महिलासहित ७० जनाको मृत्यु भएको हो ।
संयुक्त राष्ट्रसंघका प्रवक्ता स्टीफेन डुजारिकले गोलीकाण्डप्रति गम्भीर आपत्ति जनाउँदै हाइटी आतंकीत भएको बताउनुभएको छ । त्यस्तै राष्ट्रसंघको मानव अधिकार कार्यालयले एक रिपोर्ट जारी आक्रमणमा गिरोहले दर्जनौँ घर र सवारीसाधन समेत जलाएको बताएको छ ।
दुई गिरोहले करिब ४५ घर, ३४ सवारी साधन जलाएको र नागरिकलाई जबरजस्ती विस्थापन गरेको अन्तर्राष्ट्रिय सञ्चारमाध्यमहरूले जनाएका छन् । विश्वका गरिब मुलुकमध्येको एक हाइटीको राजधानी पोर्ट-ओ-प्रिन्स विभिन्न गरोहको कब्जा छ भने सुरक्षा प्रणालीसमेत ध्वस्त छ ।
रिपोर्टका अनुसार विगत ६ महिनायता हाइटीमा आन्तरिक द्वन्द्वका कारण ७ लाख मानिस विस्थापित भएका छन् । जारी द्वन्द्वका कारण त्यहाँको आधा जनसंख्याले गम्भीर खाद्य असुरक्षाको सामना गरिरहेको बताइएको छ ।